UKeet unesifiso sokuvimbela iBafana
UNOZINTI weBidvest Wits uDarren Keet unesifiso sokuthi ngelinye ilanga avimbele iqembu lesizwe iBafana Bafana.
UKhune uyisithenjwa ezintini kuBafana. Umqeqeshi omusha weqembu lesizwe, uStuart Baxter, ubuyisele yena emapalini ngaphandle kokunanaza ngesikhathi iNingizimu Afrika itholene neNigeria kowokuhlungela i-Africa Cup of Nations ngenyanga edlule.
UKhune usenemidlalo ewu-78 kwelesizwe.
UKeet (27) usanda kuqokwa njengonozinti ovelele wangesizini edlule emiklomelweni yePremier Soccer League (PSL) ebingasekuqaleni kwenyanga eSandton Convention Centre, eGoli.
Exoxa ngemuva kwemiklomelo uKeet uthe ufuna ukudlala kwelesizwe.
NgoSepthemba 1, iBafana izodudulana neCape Verde e-Estadio Nacional de Cabo Verde, eCape Verde. NgoSepthemba 5 izobe isiyemukela emlenzeni wesibili eMoses Mabhida Stadium, eThekwini. Lena kuzobe kuyimidlalo yokuhlungela iNdebe yoMhlaba eseRussia ngonyaka ozayo.
“Kuhlale kuyisifiso sami ukulwela ijezi leBafana kodwa ekugcineni umqeqeshi nguyena othatha isinqumo sokuthi ngubani ozoqala imidlalo. Kwesinye isikhathi kumele ukwamukele ukuthi uzohlala ebhentshini. Ngesikhathi ngifika kwiWits bengihlala ebhentshini. Lithe uma ithuba lokudlala lifika ngalibamba ngezandla zombili. NakuBafana ngifuna ukuya khona ngifike ngilwele ijezi ukuze ngidlale. Uma ngingathi angifuni ukudlala njalo kungcono ngimane ngingazihluphi ngokuya eqenjini lesizwe,” kusho uKeets.
Lo nozinti uhlule uDenis Onyango weMamelodi Sundowns noShu-Aib Walters weCape Town City ngesikhathi eqokwa njengonozinti ovelele.
“Kuhle ukunqoba izicoco neqembu, kube yimuzuzu emnandi siphakamisa izicoco. Ukuwina imiklomelo etholwa ngabadlali ngabodwana nakho kusho lukhulu kimina njengomdlali. Sibe nesizini enhle futhi imiqondo yethu isigxile kwisizini entsha,” kusho uKeet.
Uthe okwenze waqoma iWits ngemuva kokudlala pheshya yintshisekelo yayo yokuwina izicoco.
“IWits nami besifuna ukunqoba izicoco futhi ngijabule ukuthi sikuzuzile lokho. Njengamanje isifiso sami sekuwukunqoba isicoco seTelkom Knockout nezinye. EseTelkom Knockout yisona kuphela engingakaze ngisinqobe kwazise eseNedbank Cup ngasinqoba neWits ngo2010. Nokho uma kuqala isizini inhloso yethu kuzobe wukukuwina zonke izicoco eziphambi kwethu. Ngihlale ngisho ukuthi uma ungenaso isifiso sokunqoba yonke into kumele uvele uzihlalele ekhaya ungayi ejimini,” kusho uKeet.
IWits izovula isizini entsha ngeMTN 8 okungesinye isicoco esidle ngesizini edlule. Izobe iqhathwe neLamontville Golden Arrows kuma-quarterfinals. Izitshudeni sezisayinise uDaylon Claasen, Steven Pienaar noThato Thlone.