I-SABC idilize inqwaba yabahlaziyi
USELINDE i-SABC ukuzwa ngekusasa lakhe umdlali owaduma kwiKaizer Chiefs uFabian McCarthy inkontileka yakhe efinyelele emaphethelweni nale nhlangano yezokusakaza.
UMcCarthy owayeyibamba kwiChiefs nakwiMamelodi Sundowns, kuvela ukuthi inkontileka yakhe iphelile kwaSABC, lapho abehlaziya khona ibhola.
“Yebo, inkontileka yami iphelile kodwa sisaxoxa nabakwaSABC. Ukuphela kwenkontileka akusho ukuthi usuxoshiwe. Okwamanje ngisalinde i-SABC ukuthi izothini njengoba besixoxa nayo,” kusho uMcCarthy.
Ubehlaziya ibhola ku-SABC 1 aphinde enze umsebenzi ofanayo kwiRadio 2000.
UChris Bongo naye uphelelwe yinkontileka, ukuqinisekisile ukuthi inkontileka yakhe iphelile kwa-SABC.
“Inkontileka yami iphelile. Nokho abantu kumele bangilindele maduze kukhona lapho ngizothushuka khona. Ukuhamba kwami eSABC akusho ukuthi sengihlukene nebhola. Ngisazoqhubeka nokwenza imisebenzi ezongigcina emehlweni abantu,” kusho uBongo. Kuvela ukuthi abahlaziyi abahlukene akade bebonakala ezinhlelweni ezahlukene zezemidlalo kwaSABC, baphelelwe izinkontileka zabo futhi abalazi ikusasa labo nale nhlangano. Iphephandaba lesiNgisi langeSonto liveze ukuthi uMarks Maponyane, Mike Mangena, Papi Khomane, Rabbie Moripe, Gloria Brown bangabanye abatshelwe ukuthi ngeke zivuselwe izinkontileka zabo uma kuqala isizini entsha yebhola. Ngisho noTshepo Mabona othula uhlelo iLaduma ukuqinisekisile ukuthi inkontileka yakhe ayivuselelwanga.
Uthe utshelwe sekusele izinsuku ezine ngaphambi kokuphela kwayo ukuthi ngeke isavuselelwa.
Uthe ngesikhathi bemtshela lezi zindaba baveze ukuthi azikho izikhalo abanazo ngaye njengoba ebewenza kahle umsebenzi kodwa inkampani imchitha ngoba ayenzi kahle ezimalini.
Ethintwa uKaizer Kganyago okhulumela i-SABC, uthe,“Akukho engingakuphawula manje. Abaphathi basalulungisa udaba.”