Uzidubulile othethiselwe ukulala
USALE ushaqekile umndeni wentombazane yaKwaMsane eMtubatuba okuthiwa izidubule ngesibhamu sikayise emuva kokuba unina eyithethisele ukulala esontweni ngeSonto.
Uhlulwa nawukukhuluma uMnuz Mxolisi Mngadi onguyise kaHlelile Thalente Shobede (16), okuthiwa uzidubulele egaraji lakubo ngo-2 ntambama ngeSonto. Kuthiwa unina kamufi, oyiphoyisa khona eMtubatuba, umbuze ukuthi ubelaleleni esontweni kushunyayelwa. Kuthiwa umufi uthe ubelele esontweni ngoba ubezela kodwa unina wanganeliseka ngempendulo yendodakazi yakhe baqhubeka nokungaboni ngaso linye. Kuvela nokuthi ingxabano iqongile umama etshela umufi ukuthi akayithandi indlela aziphethe ngayo kumele ahloniphe njengengane. Kuthiwa uze washaya umufi umfana obekhona endlini wazama ukulamula. Kuvele ukuthi akuphelanga sikhathi unina kamufi esaphumile endlini wezwa sekuqhuma isibhamu egaraji.
UMngadi okuthiwa akamzali ngokwegazi umufi, ukuqinisekisile ukuthi kusetshenziswe isibhamu sakhe kulesi sehlakalo. UMngadi, oshayela amaloli, uthe kusenzima ukukhuluma ngokwenzekile ikakhulukazi ngoba kwenzeke yena engekho ekhaya.
“Bengingekho ngisemngcwabeni ngesikhathi kuvela lesi sehlo ekhaya. Noma ngingeke ngichaze kakhulu ngokwenzekile kodwa kuyavela ukuthi ingxabano isuke ngoba ingane ibuzwa ukuthi ibilaleleni esontweni. Angazi ukuthi isithole kanjani isibhamu sami ngoba bengisivalele ebhokisini laso ekamelweni,” kuchaza uMngadi.
Kuthiwa uThalente utholakale egaraji nesibhamu eduze kwakhe, kugobhoza igazi phansi. Uphuthunyiswe esibhedlela washonela khona engakabonwa ngisho wodokotela.
UMngadi uthe zintathu ezinye izingane zakubo kamufi eziphazamiseke kakhulu emqondweni ngenxa yokwenzekile.
“Izingane zakwabo azikwazanga nokuya esikoleni ngendlela eziphazamiseke ngayo. Kubi kakhulu nakunina. Sisadidekile ngoba uThalente ubengeyona ingane esheshe ihluthuke futhi ubengenankinga yokuya esontweni,” kusho uMngadi.
Uthe basahlanganisa nomndeni ukuthi kuzokwenziwa njani ngamalungiselelo omngcwabo kodwa basalinde nombiko wokuhlolwa kwesidumbu emaphoyiseni.
Uveze nokuthi akanaso isiqiniseko segama lesonto umufi nonina abakhonza kulo. Kuthiwa uThalente ubefunda uGrade 10 eKingdom Christian College edolobheni eMtubatuba.
Okhulumela amaphoyisa KwaZulu-Natal, uColonel Thembeka Mbhele, uthe umufi uzidubule ekhanda.
“Kuvulwe idokodo lokufa komuntu esiteshini samaphoyisa KwaMsane. Kuvulwe necala lokuphatha isibhamu budedengu kodwa akukaboshwa muntu,” kusho uColonel Mbhele.