Kubulawe umfana kuntshontshwa kubo
USUKU obekumele lube yinjabulo kumfundi obeyohaya inkondlo kuvulwa izikole izolo, lube muncu emndenini wakhe emuva kokudutshulwa kubo ngeSonto.
U-Ayabonga Ngobese (10) obefunda uGrade 5 eBerg Street Primary, eMgungundlovu, utholakale edutshuliwe kubo eMbali ebuya enkonzweni kasontosikole. Kunzima ukwamukela kunina uNksz Nozipho Ngobese ukuthi ayisekho indodana yakhe ebinguzinyobulala.
Utshele Isolezwe ukuthi indodana yakhe yaqala ngoMgqibelo ukuzilungiselela isikole.
“Wangicela ukuthi ngimsize ukumkhumbuzisa inkondlo obekumele ayisho esikoleni. Ubekujahile ukubuyela esikoleni ngoba ngimfice esezigunde isitayela, ngamgunda zonke izinwele ngisaba ukuthi kuzothethwa esikoleni,” echaza.
Kuthiwa u-Ayabonga waphuma kubo eya kusontosikole ekuseni, engeke alingene isonto elikhulu.
“Sihlangane naye esebuya, thina sisaya esontweni nomama. Ngize ngamkhumbuza ukuthi akhiye esangweni. Sesibuya ngibone isango nasendlini kuvuliwe, ngaze ngamemeza ngibuza ukuthi akakhiyanga ngani. Ngizithele kuyena elele phansi ekhihliza amagwebu,” kusho uNksz Ngobese.
Uthe bamphuthumise esibhedlela batshelwa udokotela ukuthi unenxeba lokudutshulwa futhi useshonile. UNksz Ngobese uthe endlini kwebiwe amateku nezikhwama ezimbili zemali nesinye esikhulu okusolwa ukuthi umsolwa ubeqoqa ngaso. Umndeni wakhe usadidekile ukuthi kungani umsolwa engagcinanga ngokweba kodwa angayidubuli ingane. NgeSonto ebusuku umphakathi waseMbali ushise amathayi ubhikishela ukubulawa kwale ngane, osekufake itwetwe.
Othisha nabafundi baseBerg Street bathunyelelwe umbiko ngokushona kuka-Ayabonga.
Okhulumela amaphoyisa esifundazweni uColonel Thembeka Mbhele, uthe kuphenywa icala lokubulala elenzeke ngezithuba zabo 2 ntambama.
“Umfanyana utholakale nenxeba lokudutshulwa esifubeni ekamelweni likagogo wakhe. Asaziwa isizathu sokubulawa kwakhe,” kusho uColonel Mbhele.
Kwesinye isigameko kuboshwe abasolwa abathathu ngoLwesihlanu ngecala lokubulala umfundi waseNsuze, eNdwedwe. Basolwa ngokubulala uNqubeko Ngubane (19), obefunda uGrade 12 eQalakabusha Secondary. Kuthiwa lo mfundi wadutshulwa ekhanda ngoJulayi 1 kuphangwa kubo. Omunye wabasolwa kuthiwa uyingxenye yeqembu lezigebengu ezihlalise lubhojozi umphakathi wakwaDeda. Bekulindele ukuthi avele izolo eNkantolo yeMantshi KwaMaphumulo kanti ababili aboshwe nabo basaphenywa ngamaphoyisa, basagcinwe ezitokisini.