Zivulwe ngaphandle kwezihibe izikole KwaZulu-Natal
YIZE bekwesatshwa ukuthi kungase kube nokuphazamiseka izolo kuvulwa izikole KwaZuluNatal ngenxa yombango wethenda yokuphakelwa kwabafundi kodwa akwenzekanga lokho. Ukufunda nokufundisa kuqale kahle nabafundi badla.
Lokhu kuvezwe nguMnuz Kwazi Mthethwa okhulumela uNgqongqoshe wezeMfundo eKZN uMnuz Mthandeni Dlungwane. Ezinkundleni zokuxhumana kuthiwa kunosomabhizinisi abebefuna ukuyoqhinqa emahhovisi omnyango bekhala ngokungayitholi ithenda.
UMthethwa uthe abekho abagasele emahhovisi omnyango noma ezikoleni baphazamisa ukufunda nokufundisa.
“Ukufunda kuqale kahle akukho kuphazamiseka okubekhona. Abafundi badlile akukho lapho sithole khona imibiko yokuthi kuphazanyisiwe,” kusho uMthethwa.
Uthe abangeneme ngokungayitholi ithenda kunemigudu okumele bayilandele.
“Uhlelo lokubheka izikhalo zabangayitholanga ithenda luyaqala ngoLwesine. Lwenziwa nguMnyango weziMali esifundazweni, thina asingene kulona. Sizothola umbiko wokuthi yiziphi izinkampani okumele siqhubeke nazo,” kusho uMthethwa.
Uthe lapho kunombango khona bazomnika inkontileka yenyanga othole umsebenzi kuze kuxazululwe udaba.
“Lapho kufakwe khona isimangalo sizonika lowo othole umsebenzi inyanga ukuze kungaphazamiseki ukuphakelwa kwabafundi. Kuzothi uma sekunqunyiwe bese sinika ovunwe yisinqumo inkontileka yokuphaka iminyaka emithathu,” kusho uMthethwa. Uthe ziyidlanzana izinkampani ezimangalile ngokungawutholi umsebenzi. Lolu hlelo luconsisa amathe kwabaningi njengoba luxhaswe ngemali engaphezulu kuka-R2 billion ngonyaka. UNobhala weSadtu, uNksz Nomarashiya Caluza, uthe ayikho imibiko abayitholile ngokuphazamiseka kokufunda izolo. “Besivule amehlo sibhekile ukuthi akuphazamiseki yini ukufunda njengoba bekuvulwa izolo. Akukho okuvelile, ukufunda kuqhubeke ngendlela efanele,” kusho yena.
UMengameli weNatu, uMnuz Siphosethu Ngcobo, uthe bajabule kakhulu ngokuvulwa kwezikole kodwa bakhathazekile ngokuthi kunezikole ezingakayitholi imali efakwa ngumnyango.
Uthe udaba lokuphakelwa kwabafundi lujule kakhulu ngoba luhlale lubhekene nezinkinga.
“Sithole ukuthi kunothisha abanqanyulelwe izinkontileka esingazi kwenzeke kanjani. Kunothisha abalethiwe okuthiwa abakwaFunza Lushaka okungaziwa bafike kanjani kulezi zikole. Ezikoleni ezavalwa nakhona kunezinkinga ngoba abafundi abakwazi ukufinyelela kahle kuzona,” kusho uNgcobo.