Ezokuphepha aziphathwe ngabantu basekhaya:Mahlobo
UNGQONGQOSHE wezobuNhloli, uMnuz David Mahlobo, uthe uhulumeni uzoqhubeka nokuqinisekisa ukuthi izinkampani zonogada aziphathwa ngabantu bokufika.
Izolo uMahlobo uthe kubalulekile ukuthi kuchitshiyelwe umthetho okhuluma ngokuphathwa kwezinkampani zonogada ngabokufika obizwa nge-Private Security Industry Regulation Amendment Bill.
Umkhakha wonogada yiwona okhula ngesivinini kwazise eminyakeni embalwa edlule izinkampani zonogada ezizimele ziqashe abantu abangu-500 000.
Ekhuluma nabezindaba ePhalamende, uMahlobo uthe akunankinga uma abantu ababengamasosha beba nezinkampani zonogada ngoba uma sebechibiyele umthetho bafuna u-51% wenkampani yonogada uphathwe ngabakuleli kuthi u-49% kuya phansi kube ngowabokufika.
“Umthetho we-Private Security Industry Regulation Amendment Bill uhleli edeskini likaMengameli Jacob Zuma kanti uzowudlulisela kwa-Psira uma esewusayinile,” kusho uMahlobo.
Uphinde waveza ukuthi amanye amaqembu aphikisayo athe ukuphasa kwalo mthetho kuzobulala umkhakha wonogada.
Lo mthetho uqale ukuhlongozwa ngo-2013 ukuze kuvinjwe ukuphathwa kwezinkampani zonogada ngabokufika. Ngaleso sikhathi owayengungqongqoshe wamaphoyisa uMnuz Nathi Mthethwa wayetshele amalungu ePhalamende ukuthi iNingizimu Afrika inezinkampani eziningi zonogada emhlabeni jikelele.
Abakwa-Psira bathe zingu9 000 izinkampani zonogada ezizimele, ziqashe abasebenzi abangu-500 000.
“Asifuni ukuthi izinkampani zonogada ziphathwe ngabokufika ngoba bazokwazi izimfihlo zokuphepha kweNingizimu Afrika. Sizoqhubeka nokuvikela izwe lethu nokuqinisekisa ukuthi umkhakha wonogada uphethwe ekhaya,” kusho uMahlobo.
Uthe lokhu akwenzeki kuleli kuphela kodwa kwenzeka kuwo wonke amazwe emhlabeni jikelele ngoba ezokuphepha kufanele zaziwe ngabantu abangumsinsi wokuzimilela ezweni hhayi abokufika.