UMkhwebane uphenya ngoMolefe
UMVIKELI womphakathi, u-Advocate Busisiwe Mkhwebane, uphenya udaba lokunikezwa kowayeyisikhulu sakwa-Eskom, uMnuz Brian Molefe, u-R30 million emuva kokuthatha umhlalaphansi isigubhukane ngonyaka odlule.
Encwadini ebhalelwe i-DA izolo, ihhovisi lika-Advocate Mkhwebane livumile ukuthi liphenya udaba emuva kokucelwa yi-DA ukuthi aphenye ngokunikwa kukaMolefe u-R30 million yize ephathe kwaEskom izinyanga eziwu-18 kuphela.
UNkk Natasha Mazzone oyilungu le-DA ePhalamende uthe akulungile ukuthi uMolefe anikwe imali engaka ekubeni kusolakala ukuthi unobudlelwano obunenkohlakalo nabakwaGupta.
“Asazi ukuthi ubongwa ngokwenza umsebenzi omuhle noma ubongwa ngokufaka abangani bakhe bakwa-Gupta kumathenda akwa-Eskom. Okubuhlungu wukuthi u-R30 million anikezwa wona uzophuma kubakhokhi bentela. UMolefe akufanelanga athole ngisho usheleni kumele awubuyise lo-R30 million awunikezwa kwa-Eskom,” kusho uNkk Mazzone.
Uthe akulungile ukuthi kucetshiswe abantu abanemali eningi futhi abaxhaphaza izinsiza zombuso.
UNkk Mazzone uthembise abantu ukuthi i-DA izoqhubeka nokulwa nenkohlakalo eyenzeka kwaEskom ngoba abantu baseNingizimu Afrika abasebenza kanzima bagcina sebekhokhela izikhulu ezinomhobholo.
“Imali yabakhokhi bentela kufanele isetshenziselwe ukuthuthukisa impilo yabantu bakuleli hhayi ukukhokhela izikhulu ezicebile futhi ezinobudlelwano obunenkohlakalo nomndeni wakwaGupta,” kusho uNkk Mazzone. ” – African News