‘Kukhona abazosala endleleni kowe-ANC’
ABAHLAZIYI bezepolitiki bathi kungaqopheka umlando uma ngase bonke abaholi abagaqele ukuhola i-ANC bengagcina bengenele ukhetho lokuhola iqembu engqungqutheleni yayo yokukhetha ubuholi ngoDisemba.
Laba bahlaziyi bathi kujwayele ukuthi kube abantu ababili abangenela umbango wesikhundla sikamengameli hhayi abaningi. Abaholi okubukeka beseqhulwini lombango nguDkt Nkosazana Dlamini Zuma noMnuz Cyril Ramaphosa oyiPhini likaMengameli we-ANC nelezwe.
UNgqongqoshe wezokuHlaliswa kwaBantu uNksz Lindiwe Sisulu, uphumele obala ethula umkhankaso wakhe ngempelasonto eGoli ukuthi uzowungenela lo mbango.
Abanye abaholi osekuke kwavezwa amagama abo kubalwa uSomlomo wePhalamende uNksz Baleka Mbete, uNgqongqoshe ehhovisi likaMengameli uMnuz Jeff Radebe, owayenguMgcinimafa we-ANC uMnuz Mathews Phosa owahlulwa ngo-2012 embangweni wokuba yiPhini likaMengameli le-ANC eMangaung noMgcinimafa okhona manje uDkt Zweli Mkhize.
Laba ngabanye babantu okukhulunywa ngabo okuthiwa basembangweni wokuhola i-ANC ngoDisemba.
UMnuz Protas Madlala, ongumhlaziyi wepolitiki, uthe kuseva ukuthi bonke laba baholi bangangenela lo mbango njengoba kungakavulwa iwindi lokukhankasa ngokusemthethweni.
UMadlala uthe akujwayelekile ukuthi babe baningi kangaka abaholi abagaqele esokuba ngumengameli.
“Kujwayele ukuthi kube abantu ababili abasuke bebanga. Isibalo esingaka sabazongena sikhomba ukuthi ivuthiwe intando yeningi kwi-ANC,” kusho uMadlala.
Uthe kodwa uma sezehla ngoMaliyethe, abanye babaholi bazoziqathakela kulo mbango.
“Sizobabona behoxa bejoyina ezinye izinhlangothi. Yingakho kunzima ukusho ukuthi bangaki abazosala kodwa ngicabanga ukuthi babili, ukuthi obani ngeke ngazi,” kusho uMadlala.
Omunye umhlaziyi wepolitiki uMnuz Thabani Khumalo, uthe kuzoqopheka umlando ngoba baningi abantu abazongenela umbango.
Uthe kodwa lesi sibalo esikhulu sabasembangweni sikhomba ukuthi i-ANC ihlukene.
“Kusho khona ukuthi i-ANC ihlukene. Alukho ubumbano ngoba kusho ukuthi uma kukhona umholi okhala ngaphansi kunabantu azohamba nabo,” kusho uKhumalo.
Uthe kukhulu ukungathembani yingakho abantu sebephume baba amaqoqo. “Akhona namathuba okuthi kuqhamuke abanye nabo abafuna ukuba abaholi. Akukuhle ukuthi wonke umuntu azibone engumholi,” kusho uKhumalo.
UMnuz Lukhona Mnguni, waseNyuvesi yaKwaZulu-Natal, ekhuluma neSolezwe wathi ubona i-ANC izohlukana ngoDisemba njengoba bebaningi abaholi ababangayo.
UMnguni wathi i-ANC iyayazi inkinga okumele iyilungise ukuze ingalahlekelwa ukwesekwa ngabantu bakuleli, ukuxosha uMengameli Jacob Zuma.
UMnuz Zizi Kodwa okhulumela i-ANC kuzwelonke, uthe akekho umuntu osephakanyisiwe.
“Umthetho we-ANC uthi abantu bazophakanyiswa amagatsha, okusho ukuthi wuSepthemba,’’ kusho uKodwa.