‘AbakwaGupta abayeke i-ANC ihole’
USIHLALO we-ANC KwaZulu-Natal, uMnuz Sihle Zikalala, uthe umndeni wakwaGupta osolwa ngokulawula umbuso wakuleli kufanele udedele i-ANC ukuthi yenze umsebenzi wayo wokuhola abantu baseNingizimu Afrika.
UZikalala ukusho lokhu izolo ngesikhathi ehambele esifundazweni iMpumalanga noMnuz Super Zuma uNobhala we-ANC namalungu esigungu esiphezulu se-ANC.
Kwabebehamba nabo bekukhona noMnuz Des van Rooyen lapho behlangane nobuholi baseMpumalanga obekukhona kubo uSihlalo wesifundazwe uMnuz David Mabuza nethimba lakhe.
Uthe bayabeseka ubuholi bukaMengameli Jacob Zuma ngoba ngumholi wabo nabo bonke abantu baseNingizimu Afrika.
Ebuzwa ukuthi ngabe bazokwenzani eMpumalanga, uZikalala uthe bazoqhuba umsebenzi we-ANC.
“Sibona kubalulekile ukugcizelela ubumbano kuzo zonke izinhlaka ze-ANC esikhathini lapho kunezinhlaka ezifuna ukudicilela phansi umbutho. Siyezwa kuthiwa abakwaGupta baphethe umbuso sithi kubo mabadedele i-ANC iphathe izwe ngoba i-ANC ngeyabantu,” kusho uZikalala.
Uthe abahambisani nokuthi umuntu ozowina ashaqe zonke izikhundla zobuholi kwi-ANC nohlangothi oluthile.
UZikalala akaqali ukusho lokhu kwazise wawuphakamisa lo mbono engqungqutheleni ye-ANC ebiseGoli ekuqaleni kwale nyanga.
Lo mbono wesekwa nanguMengameli Jacob Zuma njengoba wathi uzohambela zonke izifunda echaza ukuthi kubalulekile ukuthi owinayo angashaqi zonke izikhundla ukuze kubumbane i-ANC.
Kubuzwa ukuthi ngabe kukhona okuphakanyisiwe ngabazohola i-ANC emuva kwengqungquthela yangoDisemba uMabuza uthe ayizange iphathwe leyo ndaba. Lokhu kuyaxaka ngoba izintatheli ebezihambele eNutting House, eseMbombela lapho bekunomhlangano khona, zibone amaphepha abenohlu lwamagama elokuqala igama belithi NDZ elesibili lithi Cyril. “Asizange siyithinte indaba yokuqokwa kobuholi engqungqutheleni ye-ANC ezoba ngoDisemba besikhuluma ngemigomo ye-ANC nokunye okuthinta umbutho. Sithanda ukuziqhelelanisa nabakwaGupta ngoba asinabo ubudlelwano nabo. Akukho esingakuphawula kulolu daba,” kusho uMabuza. Uthe abahambisani nezinhlangothi ezithile ngoba bona basebenzela ukuthi umbutho ube yinto eyodwa kungabibikho ukuphikisana kwemibono. THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.