Amaphoyisa aseSiphingo asola abaphathi ngokucwasa
AMAPHOYISA esiteshi saseSiphingo asola abaphathi bawo ngokucwasa amaphoyisa amnyama.
Amaphoyisa athinteka kulolu daba, okukhona kuwona nawophiko lwabaseshi, adube ukusebenza ekuqaleni kwale nyanga ethi afuna kususwe abaphathi ababili abangabomdabu baseNdiya bophiko lwabaseshi kulesi siteshi ababasola ngokucwasa ngokwebala.
Umthombo ongavumelekile ukukhuluma nezintatheli osebenza ngaphakathi kulesi siteshi uthe isimo asisihle phakathi kwabasebenzi nabaphathi.
“Kunabantu abahleli abangasebenzi ngoba bethathe ilivu yokugula bekhala ngokuba nembandezeko ngenxa yale nto yokucwaswa. Abanye bacele ukususwa bayiswe kwezinye iziteshi sekusiza khona ukuthi kubakhona abaqashwayo endaweni yabo. Kodwa isimo sokusebenza asisihle,” kusho umsebenzi.
Uthe abasebenzi bayeke ukusebenza ngoJulayi 4 ngoba bethi bafuna kususwe abaphathi ababili okugodlwe amagama abo.
Ngokusho kwakhe le nkinga isophikweni lwabaseshi kodwa ukuphazamiseka kwabo emsebenzini kuthinta nophiko lwamaphoyisa agqoka umfaniswano nawo angeneme ngesimo sokusebenza esiteshini.
UMnuz Eddie Khathi onguNobhala wesifunda sasePinetown namaphethelo enyunyaneni yamaphoyisa iPolice and Prisons Civil Rights Union (POPCRU) uthe izikhalo zabasebenzi zifikile kubona.
Uthe nangosuku abasebenzi abayeke ngalo ukusebenza befuna ukuthi kumiswe abaphathi babizwa ukuze bazoxoxisana nabo.
UKhathi uthe sekunesikhathi bethola izikhalo kumalungu abo asebenza esiteshini esiseSiphingo futhi sebezamile ukuxoxisana nabaphathi abathintekayo.
Uthe udaba lwakhona lulungiswa wubuholi benyunyana esifundazweni.
Ngokwencwadi ethunyelwe ngomunye umsebenzi ecacisa ngezinsolo ezibekwa abasebenzi, kube nomhlangano nabaphathi besiteshi ngoLwesine oludlule lapho kukhulunywe khona ngokucwaswa kwabasebenzi, ukuhlukunyezwa kwabathile ngomunye wabaphathi bophiko lwabaseshi nokunye.
Kule ncwadi kuvele ukuthi umphathi omusha wesiteshi ufakelwa ingcindezi ngabaphathi abasolwayo okwenza ukuthi angakwazi ukuxazulula isimo.
Izolo okhulumela amaphoyisa KwaZulu-Natal, uCol Thembeka Mbhele, ukuqinisekisile ukuthi amaphoyisa asesiteshini saseSiphingo alaxaze umsebenzi ngoba enezikhalo.
Uthe ngumphathi wesiteshi olalele lezo zikhalo zamaphoyisa angeneme.