Bazonquma ngezingxoxo zabakwa-10111
KULINDELEKE ukuthi ziqhubeke ngasekupheleni kwesonto izingxoxo ngezinkinga zabasebenzi basezikhungweni eziphendula izingcingo kwaSAPS i-10111.
Izingxoxo bekufanele zibe khona ngeSonto phakathi kwezinyunyana zabasebenzi, iPolice and Prisons Civil Rights Union (POPCRU) neSouth African Policing Union (SAPU) nabaqashi uSAPS emahhosi eCommission for Conciliation Mediation and Arbitration (CCMA) , eCenturion, ePitoli, kodwa zamiswa ngemuva kokuthi iPopcru ikhale ngokuthi inikwe isikhathi esingenele ukulungiselela umhlangano.
Ngesonto eledlule abasebenzi bezikhungo kuzwelonke batelekile bekhala ngesimo sokusebenza abathi asigculisi. Abanye babo bathi sebeneminyaka engaphezu kwewu-20 benza umsebenzi kodwa abakakhushulelwa esigabeni esilandelayo samaholo ekubeni abenza umsebenzi ofanayo nabo kweminye iminyango kahulumeni bebonelelwa kangcono.
Okhulumela iPopcru kuzwelonke, uMnuz Richard Mamabolo, uthe baziswe ngoLwesihlanu sekusele isikhathi esincane ngomhlangano bangaba naso isikhathi esanele sokuzilungiselela.
“Bekuyilungelo lethu ukwaziswa ngokuzobhungwa ngesikhathi umhlangano uqala. Ngaphezu kwalokho umqashi neSapu banikeziwe imvume yokuhlanganyela ezingxoxweni kwiCCMA, thina sanganikezwa ithuba elifanayo kulo mhlangano,” kusho uMamabolo.
Uthe basazokucubungula bese beyanquma ukuthi izingxoxo kumele ziqhutshwe yiCCMA noma yiSaftey and Security and Sectoral Bargaining Council (SSSBC).
UMnuz Oscar Skommere, uNobhalajikelele weSapu kuzwelonke, ukuqinisekisile ukuthi izingxoxo kaziqhubekanga.
“Uma iPopcru isifake incwadi yesicelo sokuhlanganyela ezingxoxweni njengokuyalela kweCCMA , izingxoxo zingaqhubeka ngoLwesihlanu,” kusho uSkommere. Yize abasebenzi beke bashiya phansi umsebenzi ngesonto eledlule kodwa babuye babuyela, izingxoxo zizoqhubeka besebenza.