Iwumqemane engawadli ama-ARV
INGANE eneminyaka eyisishiyagalolunye yaseNingizimu Afrika okwatholakala ukuthi inegciwane lengculazi inenyanga, seyiphile iminyaka eyisishiyagalombili nohhafu ingayidli imishanguzo yokulithithibalisa futhi ingaguli.
Lokhu kuvele engqungqutheleni i-International AIDS Society Conference (IAS) eseParis, eFrance kuleli sonto.
Le ngane yanikwa imishanguzo yokuthithibalisa igciwane lengculazi ama-antiretrovirals (ARVs) isikhathi esingamasonto angu-40 emuva kokuthi kutholakale ukuthi inalo.
Lokhu kwakuyingxenye yocwaningo ukuze kubonakale ukuthi igciwane lingathatha isikhathi esingakanani ngaphambi kokuthi libuyelwe amandla bese liziphindaphinda. Kuvamile ukuthi kuthathe amasonto nje ukuthi igciwane libuyelwe amandla uma isiguli siyeke ama-ARV. Abacwaningi bathe basiqaphile isimo sale ngane ngenhloso yokubheka amasu okuthola ikhambi lokwelapha igciwane lengculazi.
Umcwaningi waseNingizimu Afrika ongomunye wabahamba phambili kulolu cwaningo, uDkt Avy Violari, uthe usemninigi kakhulu umsebenzi okusafanele wenziwe ukuze kuqondakale kahle ukuthi yenze kanjani le ngane ukuthi idambise igciwane ngaphandle kokusizwa yimishanguzo.
“Kodwa asikholwa ukuthi amasonto angu-40 okudla ama-ARV yiwo aholele ekudambiseni igciwane,” kusho uDkt Violari.
Ubulili bale ngane nedolobha ephuma kulona akuzange kudalulwe ngenhloso yokuyivikela.
Lolu cwaningo olwaziwa ngeCHER lenziwe phakathi kuka2005 no-2011 eSoweto naseCape Town lapho bekuphenywa ngokuthi yisiphi isikhathi esifanele sokuqala ukunika izingane ezisanda kuzalwa imishanguzo nokuthi ngabe kuphephile yini ukuphazamisa ukunikwa kwazo imishanguzo.
Yize kuke kwaba nemibiko ngeziguli ezikwazi ukudambisa igciwane lengculazi ngaphandle kokudla imishanguzo kwamanye amazwe, kungokokuqala e-Afrika.
Kweminye yemibiko esanda kuvela kubalwa owengane yaseMississippi, e-United States of America (USA) ezalwe inegciwane ngo-2010 yase iqaliswa imishanguzo emuva kwezinsuku ezimbili izaliwe kodwa yaphinde yayekiswa isinezinyanga ezingu-18. Ikwaze ukuhlala iminyaka emibili igciwane lidambe lafinyelela ezingeni lokuthi lingatholakali uma ihlolwa kodwa labuye lavela egazini. Kuke kwaba nemibiko yomuntu omusha waseFrance ohlale iminyaka engu-11 engayidli imishanguzo kodwa engakhombisi zimpawu zokuba negciwane yize ayeqale watholakala enalo.
UDkt Anthony Fauci weNational Institute of Health e-US, uthe ukholwa ukuthi kunendlela eyindida evimbela igciwane ukuthi lingaziphindaphindi. Uthe bona bahlalelwe umsebenzi wokuthola ukuthi yini lena eyenza lokhu.
“Kungabe yindlela umzimba olwa ngayo uma utholana negciwane okuyinto eyenzeka emzimbeni womuntu oyedwa noma ababili kodwa hhayi kuwo wonke umuntu? Kungenzeka ukuthi yinto ethile ngegciwane? Kungenzeka yini ukuthi ukusheshe unike umuntu imishanguzo kwenza ukuthi kusuke ingxenye ethile yegciwane enamandla okuziphindaphinda bese kusala ingxenye ethile yalo igciwane engakwazi ukuziphindaphinda? Kungenzeka ukuthi kuhambisana namazinga egciwane? Noma akuyona yonke lento?” kubuza yena.
UDkt Violari uthe izihlobo zengane zijabule kakhulu ngokuthi ilidambisile igciwane nokuthi ayikhombisi zimpawu zokudinga ama-ARV.
Uthe ukholwa ukuthi abantu abafana nale ngane abanendlela thizeni yokulidambisa igciwane yibona abazoqhamuka nempendulo yokulwa negciwane lengculazi.