Odokotela bakhunjuzwa ngesifungo
INHLANGANO yodokotela, iSouth African Medical Association (Sama) ikhumbuze bonke odokotela ngokubaluleka kokulandela imigomo elawula imininingwane yeziguli zabo noma ngabe zingobani.
Le nhlangano ikhiphe isitatimende izolo ngemuva kokuphawula komndeni wowayenguMengameli wokuqala wentando yabantu kuleli uDkt Nelson Mandela ngemuva kokuthi omunye wodokotela owayeyingxenye yethimba elalimelapha ngaphambi kokuthi ashone, ekhiphe incwadi ekhuluma ngempilo yakhe.
UDkt Vejay Ramlakan owayengudokotela embuthweni wezokuvikela kuleli iSANDF, ukhiphe incwadi ethi Mandela’s Last Years.
Ngemuva kokuthi kuvele izindaba zokukhishwa kwale ncwadi, unkosikazi kaMandela, uNkk Graca Machel, namanye amalungu omndeni kaMandela okubalwa inkosi uMandla noNdileka Mandela, bazwakalise ukungenami ngokukhishwa kwale ncwadi baveza ukuthi bangase bathathe izinyathelo zomthetho.
Abomndeni kaMandela babona ukuthi uDkt Ramlakan kungenzeka ukuthi uphule umgomo obekelwe odokotela wokwenza kube yimfihlo imininingwane yesiguli.
URamlakan owayehola ithimba elalelapha uMandela wathatha umhlalaphansi ngo2015.
AbeSama baveze ukuthi bonke odokotela bayakhunjuzwa ngomgomo okwenza imfihlo imininingwane yesiguli kungakhathalekile ukuthi singubani nokuthi kubhalweni encwadini.
USihlalo weSama uDkt Mzukisi Grootboom, uthe isifungo esithathwa ngodokotela sisho ukuthi bazohlonipha izimfihlo zesiguli noma ngabe sesishonile.
Uthe ukuphula lo mgomo kubukela phansi ukwethenjwa kodokotela ngumphakathi.
Kule ncwadi kuvela ukuthi uRamlakan ukhuluma kabanzi ngokungeniswa kukaMandela esibhedlela eMedical Heart Hospital ngoJuni kwaze kwaba uyadlula emhlabeni kukhona owayengunkosikazi wakhe uNkk Winnie Madikizela-Mandela.
Uphinde akhulume ngokuqhinqa ngaphandle kwalesi sibhedlela kwezintatheli njengoba uMandela wayelashwa.