Siyabadinga ogobela abaneqiniso njengabakudala
ESIKHATHINI sanamhlanje baningi abazibuza ukuthi ngabe basekhona yini ogobela kumbe izinhlanya eziseneqiniso njengasemandulo. Sekubukeka sengathi abaningi sebethole indlela yokwakha imali ekubeni umuntu engenalo nolwazi oluphelele ngomsebenzi awenzayo. Omunye idlozi lakhe lisuke lingakabi sesimeni sokusebenza kodwa ajahe ukuthi izinto zenzeke emva kwalokho bese eyaxhamazela.
Kukhona abantu abakhonjiswayo ukuthi abahambe bayofuna uhlanya olusendaweni ethizeni basho negama ngoba sebebonile abanikazi bomsebenzi nabadinga usizo ukuthi kulapho bezomthola khona onempande abayidingayo. Kodwa inkinga uthola ukuthi umuntu oyalelwa kanjalo uthi esahamba eduka ebuza indlela azithele kugobela kumbe uhlanya oluzomedusa luthi “hhayi mina ngingakwenzela lokho”. Yingakho-ke manje usubona umsebenzi wedlozi uqhubeka ubukeleka phansi.
Ngisuswa yisibonelo esihle esenzeke kwesinye isangoma esiseMgungundlovu, uMakhosi uMatobhana KaMbheshe ozinze esiNathingi. Kwafika kuye ithwasa elathwasa kodwa ngokudideka nokudidwa abasekhaya lagcina selikhetha ukulaxaza ukuthwasa langena esontweni ngoba libona izinto zingahlangani futhi lithi akwenzeki lutho.
Indaba iqala kanje: Ngenkathi ithwasa selikhethe ukuphephela esontweni, kuthe ngelinye ilanga lihlezi esontweni lezwa izwi lekhehla inkonzo isha lithi: “Njengalokhu ulapha umsebenzi wethu uwushiye nobani?” Ithwasa lithi lavele laliziba lelo lizwi. Lithi njalo uma lisesontweni belilokhu libuya ilizwi libuze umbuzo ofanayo. Kuthe ekugcineni lathi ikhehla: “wena uhamba uthi izinto zakho azilunganga, kufanele uyogida komalume wakho. Hamba uyofuna uMakhosi uMatobhana kube nguyena oyokugidisa, lokhu sekuyaphuthuma.” Nebala indaba iqale lapho ithwasa lasukuma liyofuna uMatobhana elimyalelwe yikhehla. Latshelwa ukuthi uMatobhana useMgungundlovu futhi naye uMakhosi lona wake wahlangana noMatobhana inkinga kwaba wukuthi wayengenazo izinombolo zakhe engazi nokuthi ukuphi noMgungundlovu. Waluqalake uhambo lwakhe.
Wathinta ayethwasa nabo ebuza ukuthi bayamazi yini ugogo Matobhana. Wazithela kwenye insizwa abathwasa nayo esigodlweni esisodwa kodwa yena wayengaphambili kwale nsizwa ngokuthwasa. Bahlanganile wabuza kule nsizwa ukuthi ngeke yini yamsiza ngokumxhumanisa nogogo uMatobhana ayeyalelwe yena. Le nsizwa ilingise uPetrus owaphika uJesu kathathu iqhude lingakakhali ngoba yamphika uMatobhana yahlanza okwayizolo yathi ayimazi nakwamadala eJuteni. Le nsizwa imphika nje uMatobhana imazi kahle ngoba babebonana ngisho esontweni besahamba izinkonzo ndawonye kanti nesigodlo le nsizwa edlule kuso naye uMatobhana udlule kusona elungisa izinto zakhe ezonakala. UMatobhana lona wuqweqwe lwesangoma esathwasa ngeminyaka yo-1980 okwathi sekonakala izinto zakhe wathola ikhaya elisha esigodlweni asebebuya kusona bonke kodwa ngezikhathi ezehlukene. Namhlanje sebephikana bonke ekubeni kufanele basizane.
Le nsizwa kunokuthi isize uzakwabo yona bese ibona ithuba kulo makhosi. Yabe isithi yona ekubonayo njengoba ingamazi uGogo Matobhana wukuthi kufanele imqale phansi uMakhosi owayedinga usizo ngoba sengathi akathwasiswanga kahle lapho athwasa khona. Yathi yona izomthwasisa nozakwabo bamqondisele izinto. Ukhumbule ukuthi le nsizwa akukapheli ngisho iminyaka emibili iphothulile njengoba isithi isingathwasisa. Nokho akaphakamisanga mhlwengwa umakhosi lona. Uye wavalelisa kodwa waqhubeka nokufuna uGogo Matobhana agcina emtholile. Wenzekile umcimbi womgido lajabula idlozi. UGogo Matobhana wabe esechazela umakhosi ukuthi yena walinda iminyaka eyisikhombisa ethwasile ngaphambi kokusebenza ngakho nomakhosi akafunde ukulinda.
Lapha sibona izinto ezintathu: ukuthunywa yidlozi ngoba lizikhethela umuntu elifuna ukuthintwa uyena, kube umuntu othwasile kodwa odlala indlala nephango ngokufuna ukuphikisa okwedlozi bese esuthisa isisu sakhe, kube umakhosi oneqiniso owazi okufunwa yidlozi.
Baningi abathunywa kanjena ekugcineni badlale izilambii nezinswelaboya okwenza umsebenzi wedlozi ungabe usahlonipheka. Ngiyazi ukuthi basekhona ogobela nomakhosi abafana nogogo uMatobhana kodwa asithandazele ukuthi bande ukuze umsebenzi wedlozi uhlonipheke nasesizukulwaneni saseAfrika. ASIPHAHLE Esebuya entabeni wafica abafundi bakhe belele wabuza wathi: “Kodwa beningelinde”
Bhedlindaba 033 569 1317/079 7471 911.