Abasekwe abafuna ukuzibulala
NJENGOBA side siqhubeke njalo isihlava sokuzibulala badinga ukwesekwa bangacwaswa abantu abazama ukuzibulala nabesabisa ngakho.
Ngokwezibalo zeSouth African Depression and Anxiety Group (SADAG) balinganiselwa ku-230 abantu abazama ukuzibulala usuku nosuku eNingizimu Afrika, abawu23 kubona bagcina bezibulele.
Phezu kwalokhu abantu abangaphezu kuka-16.5% banesifo esiphazamisa umqondo ababhekene naso, abanye abawu-30% bangase bagcine benesifo esithikameza umqondo esikhathini esithile empilweni yabo.
UMnuz Shouqat Mugjenker, ongamele ezokulashwa kwezifo ezithikameza ingqondo enkampanini yemishanguzo iPharma Dynamics, uthe abantu bavame ukungazinaki izimpawu zembandezeko nezigcina ziholele ekutheni abantu abaningi bazibulale.
“Isikhathi esiningi izimpawu zembandezeko nokhwantalala nezinye ezincike ezifeni ezithikamezayo kazinakwa. Kubalulekile ukwazi ukuthi lezi zimpawu zidinga ukusukunyelwa njengezikashukela, umfutho ophezulu wegazi nanoma yisiphi isifo. Kuvamile ukuthi abantu abakhala befuna usizo (ngoba benemicabango yokuzibulala) bathathwe njengabantu abafuna ukunakwa,” kusho uMugjenker.
Kuleli sonto esiphuma kulo, omunye wabaculi beqembu laphesheya elidumile, iLinkin Park, uChester Bennington (41), utholwe efile emzini wakhe – kuqinisekisiwe ukuthi uzibulele.
Ngaphandle kwakhe seziziningi izigameko zabantu abangosaziwayo abashona ngokuzibulala.Kubona kubalwa umdlali wamafilimu waphesheya, uRobin Williams, nabanye. Lena akuyona into entsha, kudala usaziwayo waseUnited States, uMarlyn Monroe, wazibulala ngo-1962.
Lesi sihlava asidlangile kuphela phesheya kodwa naseNingizimu Afrika sezike zaba khona izikhawu zabantu abazibulalayo ikakhulu labo abasemehlweni abantu. Omunye walaba kube ngowayengumlingisi weYizo Yizo, uChristopher Kubheka, owayaziwa ngoGunman, uMoses Taiwa Molelekwa owayengumdlali wopiyano owashona ngo-2001.
UMugjenker uveze ukuthi emuva kokufa kukaWilliams ngokuzibulala, sanyuka isibalo sabantu ababefona beveza ukuthi banemicabango yokuzibulala noma sebezamile bahluleka.
Uthe bakholwa wukuthi namanje kuzokwenzeka into efanayo njengoba kusanda kuvela imibiko kaBennington. Ngokusho kwakhe abantu baphumela ngaphandle bazame ukuthola usizo noma umuntu ozobalalela – ikakhulu uma sekukhona umuntu ozibulele waphumelela.
UMugjenker uthe abantu abanemicabango yokufuna ukuzibulala abavele bazibulale kodwa baba nezimpawu abazivezayo kuqala ngoba basuke befuna usizo.
Uthe kufanele imindeni iziqaphele izimpawu ngoba zingasiza ukusindisa impilo yelungu lomndeni elinale micabango.
Ezinye zezimpawu ziba ngezokuphatheka kabi, omunye ahlale ekhuluma noma enza amahlaya ngokufa kwakhe, kokunye uyasho ukuthi ufuna ukuzibulala.
Kubalulekile ukuthi imindeni ikusukumele ukusiza umuntu osuke enezimpawu zokufuna ukuzibulala uma izibona. Lokhu kufanele kwenziwe ngaphandle kokumenza azizwe esephutheni ngokufuna ukuzibulala.
“Akufanele nimenze azizwe enecala noma ekhishwe inyumbazana ngenxa yemicabango yakhe. Kufanele niqinisekise ukuthi uthola usizo lwezempilo bese ethola nabantu angaxoxisana nabo ngemizwa nemicabango yakhe,”
Kunezinkundla ezehlukene ezingasiza abantu abanenkinga yembandezeko nokhwantalala nasebenemicabango yokufuna ukuzibulala.
Ezinye zalezi zinkundla ngeyaziwa ngeLet’s Talk engatholakala ku-www.letstalkmh. co.za lapho abantu bengathola khona ulwazi abaludingayo ngezifo ezithikameza umqondo. Bangaphinde bafunde ngabanye abantu abadlule esimeni esifanayo.
Ezinye zezimpawu ezikhombisa ukuthi umuntu usengozini yokuzibulala zincike kakhulu ezimpawini zembandekezelo nokhwantalala:
Ukukhuluma ngokufa noma ukufuna ukufa – kokunye bathi bafisa sengathi abazange bazalwe
Ukugcina amaphilisi ayinqwaba noma isibhamu ngenhloso yokuzibulala
Ukungafuni ukuxhumana nabanye abantu noma ukufuna ukuhlala wedwa ngaso sonke isikhathi
Ukusheshe acasuke bese ejabula ngokweqile aphinde abe umuntu oselahlekelwe yithemba ngosuku olulodwa.
Uhlale exakanisekile ngokufa nodlame
Uzizwa ebophekile noma empintsheke ekhoneni ngaphandle kwethemba ngenxa yesimo akusona
Ukuphuza kakhulu utshwala yize ebengajwayele ukwenza lokho Ukungalali ngokwanele Ukuzibandakanya ezintweni eziyingozi njengokusebenzisa izidakamizwa, ukushayela budedengu
Ukunikela zonke izimpahla zakhe kubantu ngendlela engaqondakali
Ukuvalelisa abantu engathi ngeke aphinde ababone
Ukuthola usizo oluphuthumayo nokululekwa ngoba unemicabango yokuzibulala noma ukusiza onale nkinga ungathinta ulayini wamahhala wePharma Dynamics ku -0800 205 026 lapho kunabaluleki abaqeqeshiwe kusuka ngo-8 ekuseni kuya ku-8 ebusuku nsuku zonke.
Ungathinta nolayini wabakwaSouth African Depression and Anxiety Group (SADAG) ku- 0800 567 567 noma uthumele isms ku- 31393.