Balahlwe elakubo ‘bebamba’ inkunzi
ZIWAKHALELE amadoda amabili kwayisithupha asolwa ngokubamba inkunzi indawo yokugembula, iHollywood Bets eseSpringfield, eThekwini ngeSonto ntambama.
Okhulumela amaphoyisa KwaZulu-Natal, uLt Colonel Thulani Zwane, uthe abasebenzi baseHollywood Bets bebesebenza ngesikhathi kugasela abasolwa abayisithupha abebehlome bephelele bafuna ngesankahlu imali namaselula bebakhombe ngezibhamu.
Abasolwa kuthiwa baphinde balalisa phansi wonke amakhasimende abekule ndawo, bawakhuthuza ngaphambi kokuthi bashaye bachithe nesamba semali esingadalulwanga.
Kulesi sigameko kuthiwa kudubuleke elinye lamakhasimende, elilimale emlenzeni laphuthunyiswa esibhedlela.
“Amaphoyisa ahlale ezithendeni zabasolwa abebebaleka ngezinyawo kwaboshwa abasolwa ababili, oyedwa kubona ubanjwe amaphoyisa eseziphonse emfuleni, uMngeni ezama ukuhlamba awelele ngaphesheya. Omunye obekusolwa ukuthi naye ubeziphonse emfuleni ugcine engatholakalanga,” kuqhuba uZwane.
Izolo, amaphoyisa abesabheka emfuleni uMngeni njengoba bekunezinsolo zokuthi umsolwa ogcine engatholakalanga, uminzile.
Abasolwa abane basagcwele amathafa.
Amaphoyisa aseGreenwood Park aphenya icala lokubamba inkunzi ibhizinisi nelokuzama ukubulala.
“Abasolwa ababoshiwe kulindeleke ukuthi bavele eNkantolo yeMantshi yaseThekwini maduze,” kusho uZwane.
Khonamanjalo, kudutshulwe kwabulawa indoda eneminyaka engu-40 okuvela ukuthi idutshulwe ngabantu abangaziwa isemotweni yayo, emgwaqweni uCurrie, eBerea, ngeSonto ebusuku.
UZwane uthe abasolwa badubule umufi base bengena emotweni abebehamba ngayo bashaya bachitha. Kuvulwe icala lokubulala esiteshini samaphoyisa eBerea.