Basaqothwa obhejane eKZN
YIZE zehlile izibalo zokubulawa kobhejane eNingizimu Afrika kodwa KwaZulu-Natal kubonakala sibuye ngamandla lesi sihlava. Sebengu-149 obhejane asebebulewe nonyaka uma kuqhathaniswa nabangu-76 okwatholakala ukuthi babulawa ngoJulayi nyakenye.
UMnuz Musa Mntambo obhekele ezokuxhumana kwezeMvelo KZN Wildlife uthe isihlava sokubulawa kobhejane sibonakala sinyuka kulesi sifundazwe kanti bazolwa naso.
“Impi yokubulawa kobhejane ngeke siyinqobe sodwa kodwa sidinga umphakathi ube yiso lethu. Siyabonga ukuthi ezehlakalweni eziningi, wumphakathi osincinza indlebe. Siyacela uqhubeke nokusebenzisana nathi ukuze kuboshwe izigebengu ezibulala obhejane,” kusho uMntambo.
Izolo uNgqongqoshe wezeMvelo kuzwelonke, u-Edna Molewa uthe bangu-529 obhejane asebebulewe ezweni jikelele kulo nyaka uma kuqhathaniswa no-542 owawusubulelwe ngalesi sikhathi ngonyaka odlule.
Uthe ngonyaka odlule yiKruger National Park ebithwele kanzima ngoba bangu-354 obhejane ababulewe kanti kulo nyaka bangu-243.
“Isibalo sokubulawa kobhejane eKruger National Park sehle ngo-34% kulo nyaka. Siyakujabulela lokhu ngoba besingasalali sibheka izindlela zokuvimba lesi sihlava. Esikubonayo wukuthi sesihlasele KwaZulu-Natal manje kwazise bangu-149 obhejane asebebulewe kusukela ngoJanuwari kuze kube yimanje,” kusho uNkk Molewa.
Uthe akubulawa obhejane kuphela kodwa nezindlovu zibulawelwa izimpondo zazo njengoba kwenzeka kobhejane.
“Izimpondo zobhejane zebiwa eziqiwini zethu ezehlukahlukene nasemazweni angomakhelwane bethu. Kunomuntu oboshwe e-OR Tambo International esuka nophondo lukabhejane eSwazini elibhekise eHong Kong. Abaphathi bezomthetho kuleli nabaseSwazini bayasebenzisana ukuqinisekisa ukuthi izephulamthetho ziyaboshwa,” kusho uNgqongqoshe uMolewa.
Uthe bangu-359 abantu ababoshiwe futhi bashushiswa ngamacala okubulala obhejane.
Uveze ukuthi abangu-90 baboshwe eKruger National Park kanti abangu-112 baboshwe ezindaweni ezakhelene nale paki.