Akafuni aye esigabeni esikhokhelayo
UMQEQESHI wesibhakela sama-amesha KwaZuluNatal, uNkosinathi Hlatshwayo, akayizwa eyokuthi ibhokisa lesifazane eligila izimanga, uNomusa Ngema, akhuphukele esigabeni esikhokhelayo.
UNgema (24) waKwaMashu, uthole umklomelo weBest Female Boxer of The Tournament emqhudelwaneni iSanabo Elite Boxing Championships osongwe ngempelasonto. Lapha izifundazwe ezahlukene eNingizimu Afrika bezikade ziqhuthana amakhilane. Umhlanganiso udliwe yi-Eastern Cape njengokwejwayelekile, kwalandela iKZN ebuye nezindondo zegolide eziyisihlanu, amasiliva ayisishiyagalolunye namathusi ayisihlanu. UNgema uwine umklomelo nje kusaphele izinyanga ezimbili ewine indondo yegolide eseqenjini lesizwe emqhudelwaneni iZone 4 African Regional Boxing Championships ebikade ise-Angola. UNgema ungomunye wabashayisibhakela okuhlale kuthenjelwe kubona eqenjini lesizwe kwabesifazane.
Nyakenye ku-Sanabo, uNgema wathi useyafuna ukungena esigabeni esikhokhelayo. Nokho lokho kugcine kungenzekanga.
UHlatshwayo, obekade engumqeqeshi weqembu lesizwe iminyaka engaphezu kuka-10, uvumile ukuthi uNgema akasenaye untanga esibhakeleni sakuleli. Ubengomunye wabaqeqeshi beKZN e-East London.
“Akasenaye untanga eNingizimu Afrika kodwa kungaba wukuchitha isikhathi ukuya esigabeni esikhokhelayo ngoba izimpi azikho. Isibhakela sabesifazane kuleli asinakiwe. Eminyakeni edlule besikade sinoNomvelo (Magcaba) owangena esibhakeleni esikhokhelayo kodwa manje akusenzeki lutho kuyena. Kuthiwa usezoba wuphromotha,”