Kulele kuKomphela ngokubophela uMoon kwiChiefs
NAKUBA umgadli osemncane weKaizer Chiefs, uRyan Moon, enovalo ngokungasethenziswa eqenjini laMakhosi ngesizini ezayo ngenxa yokulahla amanye amathuba eqenjini lesizwe kodwa ingwazi eyayilibamba kuleli qembu laseSoweto ibona kuyisikhathi sokuthi umqeqeshi amsebenzise lo mgadli.
UMoon (20) ube yiqhawe eqenjini leBafana Bafana ebelidlala kwi-African Nations Championship lapho eshaye amagoli amabili emilenzeni emibili bebhekene neBotswana.
Njengoba kuqalwe amalungiselelo esizini entsha, uma umqeqeshi weChiefs, uSteve Komphela, ekhuluma ngokuqinisa iqembu ubalula ukuthola umgadli ongalibheki ipali ozosiza uGustavo Paez noBernard Parker. Akayiphathi ekaMoon osayiniswe kuleli qembu ngesizini edlule esuka kwiMaritzburg United.
UShaun Bartlett owayengumgadli owayeyibasela inethi, ubona kungaba yiphutha kuKomphela ukungamniki ithuba uMoon kwisizini ezoqala ngoba usezivezile ukuthi yini akwazi ukuyenza.
“Ngeke ngimkhulumele uKomphela kodwa uMoon usekukhombisile ukuthi uselungile. Yebo, kusekuningi uKomphela asengamfundisa khona ngenxa yeminyaka yakhe kodwa izwe lonke liyazi ukuthi yini akwazi ukuyenza uMoon uma ebhekene namapali. Lokhu akagcinanga ngokukwenza kontanga yakhe kwiMDC (Multichoice Diski Challenge) kodwa ukwenzile kwiChiefs ngesikhathi esincane asitholile enkundleni wakwenza futhi nakwiBafana,” kusho uBartlett.
Ngesikhathi uMoon ekhuluma ngemuva komdlalo wangempelasonto lapho igoli lakhe liweze iBafana ngo 1-0, uthe akumhleli kahle ukushweba inqwaba yamagoli.
NgokukaMoon ukushweba la magoli kungaba nomthelela ongemuhle kwiChiefs.
Usebalwa nezingwazi zaMakhosi ezishayele iBafana igoli emdlalweni wazo wokuqala njengoDoctor “16V” Khumalo, John “Shoes” Moshoeu, Jabu “Shuffle” Pule-Mahlangu noRudolph “Gardner” Seale.
“Bekufanele ngishaye inqwaba yamagoli lapha kodwa ngashweba. Ngazi kahle ukuthi ngiwatholile amagoli abemqoka kodwa ukushweba kwami amathuba amaningi kungaba nomthelela ongemuhle kubaqeqeshi beChiefs. Ubani owaziyo mhlawumbe bazonaka kakhulu lawa engiwashwebile. Iphutha likimina. Bekumele ngicophelele ekusebenziseni ngendlela amathuba engiwatholile,” kusho uMoon.
UMoon uzobuyela eqenjini ayolwela ukuziveza kuKomphela. Akakwazanga ukudlala emasontweni amabili edlule lapho iqembu beliyibambe kwiMaize Cup. Kulo mqhudelwano uKomphela unikeze ithuba nabadlali abasha, uTeenage Hadebe, Philani Zulu noBongolwethu Jayiya.
Ngempelasonto edlule ezikaKomphela beziseBotswana lapho zishukane zaze zabukana neTownship Rollers umdlalo uphela ngo 1-1. NgoMgqibelo iChiefs izodudulana ne-Orlando Pirates koweCarling Black Label Cup eFNB Stadium, eGoli, ngo-3 ntambama. NgoLwesithathu ebusuku kuzomenyezelwa izikwati zala maqembu, okuzoba ngabadlali abangu-11 iqembu ngalinye, abavotelwe
abalandeli.