UMoriri wachayisa iqembu laseGreece
INGWAZI yeMamelodi Sundowns uSurprise Moriri iphumela obala ngokuyeka ithuba lokuyodlala phesheya kwezilwandle.
Ngeledlule uMoriri (37) umemezele ukuthi uwagaxa emgibeni amakhokho ngemuva kweminyaka engu-17 eyibambile esigabeni esikhokhelayo.
Le ngwazi isizolekelela uDavid Notoane eqenjini leSundowns eligijima kwiMultiChoice Diski Challenge.
UMoriri ujoyine iSundowns ngo-2004 esuka kwiSilver Stars, wahlala iminyaka engu-13.
Uhlabane ngezicoco ezine zeligi, ezimbili zeNedbank Cup, eseTelkom Knockout neseCaf Champions League.
UMoriri utshele Isolezwe ukuthi wayeka ithuba lokuyodlala phesheya kwezilwandle.
“Ngeke ngithi ngiyazisola ngokungayi kodlala phesheya ngoba angizange ngithole inqwaba yezicelo. Ngo-2006 kuya ku-2008 kuneqembu laseGreece elalingifuna kabi. Ngakhetha ukuhlala kwiSundowns ngoba ngangiphatheke kahle. Kimina kwakungawenzi umqondo ukuthi ngishiye iSundowns inginika u-R5 ngiye kodlala lapho engizothola khona uR5.60,” kusho uMoriri.
Udlale kuyo yonke imiqhudelwano emikhulu. Ngo2010 ubekhona elakuleli lidlala kwiNdebe yoMhlaba eNingizimu Afrika. Ngo-2008 akazange asale ngaphandle iBafana Bafana iyodlala ku-Africa Cup of Nations eGhana.
“Ukumela izwe lami kwiNdebe yoMhlaba kuyohlale kuseqhulwini ezintweni engingasoze ngazikhohlwa empilweni yami yebhola. Ukunqoba iChampions League neSundowns kungeminye yemizuzu engingasoze ngayilibala,” kusho uMoriri.
Njengoba esengena ekuqeqesheni ushaya ngo-Caf B Licence.
“Iziqu ngizithole ngisadlala ibhola. Ngibonile ukuthi izinsuku zempesheni seziyasondela ngase ngathatha isinqumo sokufunda. Bengingafuni ukudlala ibhola ngisho sengizwa ukuthi umzimba awuvumi. Ngizimisele ngokusebenza kanzima njengomqeqeshi. Abantu ngeke bangehlulele ngokuthi ngenzeni njengomdlali kodwa bazongijaja ngezicoco nangesibalo sabadlali engibakhiqizile. Ngizimisele ngokukhula kancane kancane. Ngelinye ilanga ngiyafisa ukuzibona ngiqeqesha iqembu elikhulu,” kusho uMoriri.
Uthe isifiso sakhe wokuvumbulula ikhono elicashile.
“Into eyogeza inhliziyo yami kuzoba wukubona abadlali abadlule ngaphansi kwezandla daba kuFacebook (Isolezwe), kuTwitter zami sebeyizihlabani. Ikhono sinalo eNingizimu Afrika. Ngizimisele ngokulivumbulula. Eliningi ligcwele ezindaweni ezisemakhaya,” kusho uMoriri. UMoriri usebenze nabaqeqeshi abaningi kwiSundowns. “Ngeke ngisabe futhi ukuzehlisa ngiyocela izeluleko kuPitso Mosimane. Uma ngingenza njalo kungabe ngiyazibulala. Okuhle wukuthi ngikakwe yizingcithabuchopho zabaqeqeshi lapha kwiSundowns,” kusho uMoriri.