I-Downs ilinde abagaqele uBilliat
IMAMELODI Sundowns ivule isifuba ngoKhama Billiat omataniswa neqembu laseSaudi Arabia, i-Al-Nassr FC.
Ngempelasonto kusabalale amahlebezi okuthi iSundowns ifuna ukudayisa uBilliat ngoba akaziphethe kahle ngaphandle kwenkundla.
UThulani Thuswa wezokuxhumana kwiSundowns uvumile ukuthi iqembu laseSaudi Arabia selike labathinta ngalesi sibabuli saseZimbabwe.
“Iqembu laseSuadi Arabia selike lasithinta libuza ngoKhama kodwa lokho asikuthathi njengokufaka isicelo. UKhama usanenkontileka neqembu futhi ukubadlali bethu abamqoka kodwa asinankinga ukuxoxisana naleli qembu. Usaphatheke kahle eqenjini futhi naye uyalithanda. Kodwa uma kuyisicelo esihehayo sizimisele ngokusifakela izibuko ngoba asifuni ukuba yisithiyo endleleni yakhe,” kusho uThuswa.
Indaba kaBilliat yokujoyina i-Al-Nassr ibonakele iyindaba egudwini naseSaudi Arabia. Lokhu kubonakale ekhasini lalo mdlali ku-Instagram, lapho abalandeli baleli qembu bebelokhu bembuze njalo ukuthi kuyiqiniso yini ukuthi uzobe egijima kulona ngesizini ezayo. Abanye bebesho ukuthi ngeke akukhalele ukuza eqenjini Givule labo kwazise inkundla ihlezi inyinyitheka abalandeli.
Okunye okuvelile wukuthi lo mdlali uyanqaba ukuvuselela inkontileka yakhe njengoba anayo iphela ngoJuni wonyaka ozayo.
“UKhama ungumdlali oseqophelweni eliphezulu ngakho uma ukhuluma udaba oluthinta yena ngeke uthathe usuku olulodwa bese ufinyelela esivumelwaneni. Bekunzima ukuthi siqale izingxoxo njengoba iqembu belimatasa nemidlalo yeChampions League, i-Absa Premiership kwaphinde kwaba nemidlalo yamaqembu esizwe. Enye into ephazamisile ukudlula emhlabeni kwemenenja yakhe. Siyathemba ukuthi njengoba kunekhefu sizokwazi ukuhlala naye phansi ukuze sithole isixazululo,” kusho uThuswa.
Uthe kungamampunge ukuthi uBilliat akaziphethe kahle.