I-ASA ayigudluki kwekunqumile ngabadlali

INHLANGANO eyengamele ezokugijima kuleli, i-Athletics South Africa (ASA) ayigudluki esinqumeni sayo ngabadlali ebamemezele abazomela ekuleli ku-IAAF World Championship e-England ngenyanga ezayo phezu kokuthola ukugxekwa.

I-ASA yenze isinqumo esishiye iningi likhala okuhlanganisa nezilomo zabagijimi lapho ibeke ezayo izikhathi namabanga okuphansi okumele zenziwe abadlali ukuze baqokwe. Imigomo ye-ASA ibiphansi ngisho kule ebekwe yi-IAAF okuyinhlangano yezokugijima emhlabeni.

Lesi sinqumo senze kwasala ngaphandle abadlali abangu-15, okubalwa noHenricho Bruintjies oke waba ngumpetha ka-100m kuleli no-Alyssa Conley abebeseqenjini lama-Olympic nyakenye. Laba izikhathi zabo ziyahambisana nezibekwe yi-IAAF kodwa azikho ezingeni le-ASA.

Kuzobe kuqala kusukela ngo-1995 ukuthi iNingizimu Afrika ingabi naye ozoyimela ku-400mH ngemuva kokuthi uLJ van Zyl, Cornel Fredericks noLe Roux Hamman beshaye izikhathi ezingekho ezingeni le-ASA kodwa ngokwe-IAAF bebengaqokwa.

Abanezikhalo ngeqembu labangu-24 eliqokiwe bebenomnqamulajuqu wangeSonto ukufaka izicelo.

Phambilini bekungathi i-ASA iqinisa isandla ngoba izama ukonga imali. Kodwa sekuvele ukuthi ikomidi elihlela imidlalo, yilona elibhekana nezindleko zokuhamba nezokuhlala.

Umengameli we-ASA, u-Aleck Skhosana, ugcizelele ukuthi bona baneyabo imigomo. “Uma ubheka imigomo yethu yokuhlunga kuyacaca ukuthi i-ASA iyona ezobeka eyayo futhi iyona ezoqoka iqembu. Abaqoki be-ASA bazobheka ukuthi umdlali ngamunye umi kuphi ngokwesikhathi noma ngebanga ngokwemidlalo yabo. Bangamadoda nabesifazane abahloniphekile, abamane nje baqhamuke namagama. Bahlunga kahle bese bethatha izinqumo ezihloliwe.”

Ugcizelele ukuthi ukuqokwa kweqembu bekuncike ekutheni kuthunyelwe ithimba elizokwazi ukutholela iNingizimu Afrika imiphumela ezingeni lomhlaba, okuyikhona okwenze baqinisa imigomo.

“Kusazodlalwa, kumele nisijaje uma sesibuya singaphethe lutho futhi nina bezindaba nizothi kuphelile nge-ASA,” kusho uSkhosana.