Bakhale ngesikhathi bekhishwa kwiSAB/21 abaseKZN
UKHALE ngokuswela isikhathi sokuhlanganisa iqembu umqeqeshi weKwaZuluNatal ekhishwe ekuseni emqhudelwaneni iSAB Under 21 eqhubekayo eNike Centre, eSoweto.
Amaphupho eKZN ashabalale izolo ntambama emuva kokuhlulwa yiNorth West ngo 2-1 ikade ihamba phambili.
Emdlalweni wokuvula ngoLwesibili ihlulwe yiFree State ngo 2-1.
IKZN idlale ngokulingana ngo 1-1 ne-USSA emdlalweni wokuqala izolo emuva kokuhamba phambili isikhathi eside.
Lokhu kusho ukuthi lesi sifundazwe asisenalo ithuba lokudlulela kuma semi-final kwazise sinephuzu elilodwa emidlalweni emithathu.
IKZN iyibambe emsileni kuGroup B walo mqhudelwano engakaze iwuwine. Umqeqeshi uJohn Motsa akananazanga ukubeka isizathu abona sithele ngehlazo iKZN.
“Asisitholanga isikhathi sokwenza amalungiselelo, abafana abasitholanga isikhathi esanele sokuziqeqesha ndawonye,” kusho uMotsa.
“Siqoke isikwati ngoMgqibelo, futhi abadlali bafike nezikhwama ngesikhathi kuzoqokwa iqembu. NgoMsombuluko bekufanele siphikelele eGoli.
“Abafana bona badlalile, ukuba sibe ndawonye amasonto amabili noma amathathu besizokwenza kangcono.”
Isikwati seKZN siqokwe ngoMgqibelo odlule eStanger, abadlali bathathwa ngaleso sikhathi bayiswa ekhempini ehhotela eThekwini.
Iningi likhala ngombango wezinhlaka zeSafa eThekwini osekuphele isikhathi eside kungaqondakali ukuthi yiluphi oluphethe ibhola kulesi sifunda.
“Umbango oqhubekayo uyasishaya kakhulu, kodwa mina bengibona kufanele kuqokwe abazohlwaya ikhono ngesikhathi kuqhubeka imidlalo yeSAB. Kuthi uma sekuphele isizini sibe sesazi ukuthi sinalo iqembu, siligcine ndawonye lihambe liyomela iKZN.”
Namuhla iKZN izodlala umdlalo wokugcina icala neWestern Cape. Umdlalo wamanqamu uzoba ngeSonto.
*Khonamanjalo uThami Ngubane obelolonga iKwaDukuza United, ezakhele igama ifinyelela kuLast 16 yeNedbank, usezocija iMilford United edlala ku-ABC Motsepe League.
UNgubane udume kuThanda Royal Zulu, African Warriors neRoyal Eagles okungamaqembu ake wawalolonga eminyakeni eyedlule.
Umthombo weSolezwe ongashayi ecele utshele leli phephandaba ukuthi uNgubane uzoqala namuhla ukwenza amalungiselelo esizini entsha naleli qembu laseRichards Bay.