UThandolwethu kolusha kwi-ECR
UZIBONA efike ngesikhathi esikahle kwi-East Coast Radio obengumsakazi weGagasi FM, uThandolwethu Ngidi, okuthe kungakapheli nezinyanga ezimbili efikile wakhushulelwa kwesinye isikhundla.
UThandolwethu ukhuze ibuya kwi-ECR ekuqaleni kwenyanga edlule esuka kwiGagasi lapho ayethula khona uhlelo lwantambama phakathi nesonto noTrevor “TP” Phillips.
Ufike wenza uhlelo i-East Coast Love Songs ngo-9 kuya ku-12 ebusuku ngoMsombuluko kuya kuLwesine.
Kuye njengokubika kweSolezwe emasontweni edlule ngesikhathi lo msakazo umemezela izinguquko zawo eThe Oyster Box, eMhlanga izolo ekuseni.
UThandolwethu usezokwenza uhlelo i-East Coast Urban ngo-6 kuya ku-9 ebusuku ngoMsombuluko kuya kuLwesine. Ungena esikhaleni sikaBongani Mtolo osezongena noMags ngo-3 kuya ku-6 phakathi nesonto nokuwuhlelo obelwenziwa nguPhat Joe.
Uzophinde abuye ngeSonto ngo-10 kuya ku-2 ntambama okuyisikhathi obekungena ngaso uThato Molamu oseyolingisa kwiThe UThandolwethu uthe akukho okuzoshintsha ngaye. Uthe uma engasebenzi isikhathi esiningi usichitha noTP osenza uhlelo lwantambama noNomfundo Mkhize kwiVuma FM.
“Kwesinye isikhathi uma ngikhuluma into emoyeni kuke kube ngathi uzophendula kanti akekho sengingedwa,” kusho uThandolwethu.
Uthe sekuzoba lula ukuthi abantu bamlalele. Uhalalisele uBongani ngesikhala sakhe esisha.
UBongani, ongakaze asakaze kwenye indawo ngaphandle kwe-ECR, uthe uzobe esakaza sengathi “uzixoxela namajita”.
“Abasakazi abaningi manje bakhuluma ngezinto ezenzeka kwi-internet. Mina ngifuna sizixoxele ngokwenzeka empilweni yabantu abalaleli nabo bakhulume,” kusho uBongani.
Uthe kufana nokufezeka kwephupho ukuthola lolu hlelo. Elinye iphupho asesebenzela ukulifeza wukuthola uhlelo lwasekuseni.
Lolu hlelo njengamanje lwenziwa wuDarren Maule, Keri noSky. Umphathi wezinhlelo uZane Derbyshire uthe uDarren bamnikeze inkontileka yeminyaka emithathu ngenxa yokuthi uhlelo lwakhe lwenza kahle.
Izinguquko ziqala ngoMsombuluko.