Ubafihlele induku emqubeni uCeleste
UMLINGISI weSibaya nosenyamalele kuso, uCeleste Ntuli, uthi uzobuya kulo mdlalo yize incane imali esekulingiseni kuneyamahlaya.
Ukusho lokhu enkulumweni abe nayo neSolezwe ngaphambi kokuqala umjikelezo wakhe wamahlaya ozoba kusasa, ePlayhouse, eThekwini.
Lo mjikelezo ozohambela lonke elakuleli ubizwa ngeCeleste Ntuli in Black Tax.
Le ntokazi ithe, ukubonakala kwayo emdlalweni Isibaya kuyenze yafinyelela ezingeni ekulo manje.
“Ngiyakuthanda ukulingisa, kodwa akuwadluli amahlaya. Ukuya kwami eGoli ngangiyothungatha into ezongenza ngaziwe ngabantu ukuze kuvuleke amathuba amaningi emahlayeni. Lokho kwenzeka ngesikhathi ngijoyina Isibaya,” kusho uCeleste.
Uthe ithuba alithole kulo mdlalo ulithakasele kakhulu kodwa empilweni yakhe ufuna ukukhulisa umkhakha wamahlaya ukuze uhlonishwe njengeminye.
“Ngimema bonke abantu baKwaZulu-Natal beze ngobuningi babo njengoba ngizoqala uhambo lwami lokujabulisa
abathandi bamahlaya nabalandeli bami kulo mcimbi,” kusho uCeleste.
Uthe ngonyaka odlule wawenza umcimbi ofanayo kodwa wangaba yimpumelelo ngenx a yokuthi wayematasa eqopha kuSibaya.
“Ngikhethe ukuthi ngime ekuqopheni ngoba ngifuna ukunikela sonke isikhathi sami ekuhambeleni amadolobha ahlukene. NgoSepthemba ngizohambela amanye amazwe engimenywe kuwo njengoba ngizoya konandisa eNigeria,” kuchaza yena.
Uthe lesi yisikhathi sokuthi azenzele imali ngento yakhe azisusele yona phansi.
Kulo mcimbi uthe ufuna abantu ukubashiya bebambe ongezansi njengoba efihle induku emqubeni ngokuzokwenzeka kusasa.