Bajatshuliswe yisinqumo kolokuphakela izikole
izinto esikhala ngazo kulolu hlelo. Isigcawu sinqume ukuthi kulandelwe umyalelo wenkantolo yaseMgungundlovu wokuthi siqhubeke,” kusho usonkontileka.
UMnuz Sihle Mlotshwa, okhulumela uMnyango wezeMfundo esifundazweni, uthe bakhathazekile ngesinqumo senkantolo sangoJulayi 24 esithi umnyango kumele uqhubeke nosonkontileka abadala.
Uthe lokhu kusho ukuthi kumele kuqhubeke abantu abaphelelwe yizinkontileka.
“Izinkontileka zabo zaphela ngoJuni 30, 2017 banikwa nezincwadi ezishoyo ukuthi buphelile ubudlelwano. Sizosiphikisa isinqumo sale nkantolo ngokushesha. Besingazi ngesinqumo senkantolo size sazi ngaso namhlanje ekuseni (izolo),” kusho uMlotshwa. Usonkontileka waseManguzi uthe isinqumo sisho ukuthi kumele ngesonto elizayo kubuyele abebephaka kuchithwe abasha kuze kuphothulwe uhlelo lokuqokwa kwabasha abazophaka iminyaka emithathu. “Bengiphakela izikole ezintathu ezinabafundi abangu-1 200 zihlanganisiwe. Kubafundi abangu-200 kunomama oyedwa ophekayo, mina bengiqashe abayisithupha. Umama uhola u-R1089 ngenyanga. Umyalelo womnyango uthi kumele umama umkhokhekle nyanga zonke ngisho noma wena sonkontileka ungakhokhelwe,” kusho usonkontileka. Uthe ezinyangeni ezintathu uqalile ukusebenza umnyango awukukhokheli uze ukhokhe ngemuva kwezinyanga ezine.
“Usebenzisa imali yakho nje. Ngenyanga bengithenga ukudla kuka-R28 000, ngikhokhele omama ngigcwalise negesi ngo-R5 000. Ngomfundi wasesikoleni samabanga aphansi umnyango ukukhokhela u-R1.65, ngowasesikoleni samabanga aphezulu ukukhokhela cishe u-R 2 nsuku zonke. Ngenyanga ngisebenzisa cishe ngaphezudlwana kuka-R40 000, bese kuthi uma umnyango usukhokha kube yimali cishe engaphezudlwana kancane kwalokho,” kusho usonkontileka.
Uthe umnyango awukukhokheli nemali yokuya ezikoleni uhambisa ukudla ngakho osomabhizinisi bagcina sebesebenzisa imali enkulu kunabayithola emnyangweni.
Uhlelo olwabelwe u-R1.4 billion kulo nyaka wezimali luphakela abafundi abangu-2.2 million ezikoleni ezingaphezulu kuka-5 000.