‘Udlwengulwe’ owetekisi obehlwelwe
KUBOSHWE umshayeli wetekisi waKwaMashu ngezinsolo zokudlwengulwa umgibeli ongumfundi waseTshwane University, okuthiwa ubeshiywe yizimoto.
Lo wesifazane oneminyaka engu21 igama lakhe elingeke lidalulwe, ngowaseBhizana, e-Eastern Cape, kodwa ubeya kumngani wakhe KwaMashu. Isigameko senzeke ngoLwesibili ebusuku, umshayeli waboshwa khona ebusuku kwelinye lamagaraji emgwaqweni uMalandela, KwaMashu. Elandisa Isolezwe lo wesifazane uthe wayesuka enyuvesi efuna ukuya kubo eBhizana ngoLwesibili kodwa wangayithola ibhasi egodukayo.
“Ngafika emakethe eThekwini ibhasi isingishiyile netekisi yokugcina seyiphumile. Kwakuyizithuba zabo 7 ntambama. Ngashayela umngani wami ohlala KwaMashu wathi kungcono ngiyolala kubo. Wangiyalela ukuthi itekisi ngiyithathephi,” kusho umgilwa.
Uthe wayithola itekisi wacela ukuhlala phambili ngoba iselula isicishile, efuna ukuyi-charger.
“Umshayeli wangitshela ukuthi akanayo icharger kodwa uzongifonisa uma sekumele ngehle esitobhini. Indlela engangikhathele ngayo ngalala etekisini, behla bonke abantu ngasala ngedwa. Ngize ngamkhumbuza ukuthi sekumele ngifone, wathi usayothenga i-artime,” kusho lo wesifazane.
Uveze ukuthi umshayeli umjikelile engasafuni afone, wathi kungcono uzomyisa kubo ukuze aphephe bese emhambisa edolobheni ngakusasa. Uthe bagcine bephikisana bengasazwani, lo wesifazane esethi kungcono amphindisele edolobheni ayolala esiteshini samaphoyisa.
“Sihambe ngetekisi saze safika ehostela wapaka khona wathi asehle. Nginqabile wavele wayisusa itekisi wazula nami saze safika esigangeni. Yilapho eyikhiye khona wangidlwengula,” kusho umgilwa.
Uthe uvume konke abekwenza kuye enza sengathi uyathanda ukuze angacabangi ukumbulala. Sebebuya ucele ukuthi umshayeli amthengele ukudla ngoba efuna bangene esitolo bese eyabaleka. Lo wesifazane uthe bafika egaraji behla bobabili beyothenga, kanti uzobona imoto yephoyisa, wamemeze waya kulo. Kuthiwa umsolwa uboshwe khona lapho, owesifazane wayiswa esibhedlela ngakusasa waphindiswa eBhizana.
Uthe lesi sigameko simhlukumezile kodwa uzimisele ukubuya azothamela icala ukuze ajeze umsolwa.
Okhulumela amaphoyisa esifundazweni uColonel Thembeka Mbhele uthe umsolwa oneminyaka engu-23 uboshiwe kanti uzovela maduze eNkantolo yeMantshi eNtuzuma.