Kubuyise uvalo ukubulawa kwababili eGlebe Hostel
AMAPHAPHU aphezulu eHostela iGlebelands ngemuva kokubulawa kwabantu ababili ezehlakalweni ezahlukene kuleli hostela kungakapholi maseko ikhomishini ephenya ngokubulawa kwabantu eKZN ihambele le ndawo.
Ukubulawa kwalaba ababili, uMnuz Mluleki Mdletshe (32) noNkk Sibongile Mtshali (53), kwenze safinyelela ku-91, isibalo sabantu asebebulewe kuleli hostela eselidume kabi kusukela kuqale lesi sihlava eminyakeni embalwa edlule.
UMdletshe kuthiwa bese kungokwesibili ehlaselwa njengoba asinda ngokulambisa esehlakalweni sokuqala ngo-2015.
Ukubulawa kukaMdletshe kulandelwe wukubulawa kukaNkk Mtshali obenesitolo esincane ngaphakathi ehostela.
Umthombo weSolezwe ohlala kuleli hostela uthe uvalo seluqale phansi kubantu basehostela ngemuva kwalezi zigameko zangoLwesithathu.
“Bese sithi isimo sesiqala ukudamba kodwa kubukeka sengathi sesiqala phansi ukushuba,” kusho umthombo,
Okhulumela amaphoyisa aKwaZuluNatal, uColonel Thembeka Mbhele, uthe amaphoyisa aphenya amacala amabili okubulala ngesehlakalo sangoLwesithathu ebusuku.
“Owesilisa oneminyaka engu-32, udutshulwe ngabantu abangaziwa ekhanda, waphuthunyiswa esibhedlala lapho efike washonela khona, imbangela yokubulawa kwakhe ibingakaziwa,” kusho uMbhele.
Uthe khona kuleli hostela kuphinde kwadutshulwa nowesifazane ongumnikazi wesitolo.
“Nakusona lesi sigameko imbangela yokubulawa kwakhe ibingakaziwa, kusaphenywa,” kusho uMbhele.
Uthe amaphoyisa atshaliwe kuleli hostela, aqapha ubusuku nemini.
Isishoshovu esilwela amalungelo abantu esisiqaphe ngeso lokhozi isimo kuleli hostela, uNksz Vanessa Burger, sithe bese kungokwesibili uMdletshe edutshulwa njengoba ahlaselwa ngendlela efanayo nango-2015.
“Nango-2015, wayelalelwe unyendle ngabahlaseli esebuyela endlini, namanje kwenzeke okufanayo kodwa kulokho wangasinda,” kusho uNksz Burger.
UNksz Burger uthe esehlakalweni sika-2015, sokuhlaselwa kukaMdletshe kwasoleka izinkabi ezihlala khona kuleli hostela e-Block 0.
Uthe iyabakhathaza indaba yokuqhubeka nokufa kwabantu yize sekukhona amakhamera.
UNgqongqoshe wezokuPhepha KwaZulu-Natal, uMnuz Mxolisi Kaunda, uzigxekile lezi zigameko zakamuva zaseGlebelands wanxusa amaphoyisa ukuba asebenze ubusuku nemini ukuze kubanjwe abasolwa.
UKaunda uthe okubaphatha kabi kakhulu ukuthi lokhu kubulala kwenzeka phezu kwemizamo eyenziwa nguhulumeni yokuqeda ukubulawa kwabantu esifundazweni.