Amalungu e-ANC azokhetha umengameli?
KUHLUKENE imibono ngesiphakamiso esenziwa yi-ANC engqungqutheleni yemigomo ebiseNasrec sokuthi amalungu enhlangano awu-1 million kube yiwona akhetha uMengameli wezwe namalungu esigungu esiphezulu abizwa nge-Top 6.
UNobhala Jikelele we-ANC e-Eastern Cape, uMnuz Oscar Mabuyane, uthe bayaweseka umbono wokuthi amalungu e-ANC kube yiwona akhetha abaholi hhayi izithunywa ezimbalwa ezisuke zijutshwe yizifundazwe ezehlukahlukene.
“Siyasithanda isiphakamiso sokuthi amalungu ombutho kube yiwona avotela abaholi ngoba lokhu kuzovimba inkohlakalo yokuthengwa kwamavoti. Sizonxusa abantu ukuthi baweseke lo mbono ukuze kubuye intando yabantu,” kusho uMabuyane emhlanganweni wabo wesifundazwe.
UMnuz Mdumiseni Ntuli, okhulumela i-ANC KwaZulu-Natal, uthe kabahambisani nombono wokuthi kube ngamalungu e-ANC azovotela uMengameli nobuholi obuphezulu ngoba baneme ngalolu hlelo olukhona njengamanje.
“Siyajabula ngalolu hlelo lokukhethwa kobuholi be-ANC, kasihambisani nombono wase-Eastern Cape. Thina sineziphakamiso zethu okubalwa kuzo ukungahambisani nokuthi onqobile ashaqe zonke izikhundla nethimba lakhe ngoba sifuna ubunye kwi-ANC. Sifuna kube namaphini amabili kaNobhala Jikelele oyedwa ozobhekelela ezocwaningo nokuxhumana bese omunye abhekelele izindaba zenhlangano,” kusho uNtuli.
Uthe bafuna kwandiswe nabasebenzi emahhovisi e-ANC ezifundazweni babe bahlanu ukuze kuqine inhlangano.
UNksz Sasekani Manzini, ongNobhala we-ANC eMpumalanga, uthe bebengakakhulumi ngeziphakamiso abazithandayo kulesiya sifundazwe ngoba basazoxoxa namagatsha abo.
Umhlaziyi wepolitiki uMnuz Thabani Khumalo uthe uyahambisana nombono wokuthi amalungu e-ANC kube yiwona avotela uMengameli nesigungu esiphezulu.
Uthe uma amalungu e-ANC ezikhethela wona uMengameli nabazoba sesigungwini esiphezulu kuzophela ukuthengwa kwamavoti.