Udaba lomnotho luseqhulwini kowe-ANC
UNOBHALA-Jikelele we-ANC, uMnuz Gwede Mantashe, uthi udaba lwezomnotho yilona oluzoba seqhulwini kwi-Lekgotla eliqala namhlanje iphele ngeSonto.
Ekhuluma nabezindaba izolo, uMantashe uthe abaholi be-ANC kusukela namhlanje bazoqala bakhulume ngezindlela zokukhulisa umnotho baphinde babhunge ngezindlela zokuthi izwe lingaphuma kanjani esigabeni sezomnotho elikuso.
INingizimu Afrika yakleliswa namazwe angenzi kahle kwezomnotho ngemuva kwesinyathelo sikaMengameli Jacob Zuma sokushintsha ikhabhinethi yakhe esabanga ukuthi obenguNgqongqoshe weziMali, uMnuz Pravin Gordhan, nePhini lakhe, uMnuz Mcebisi Jonas, baxoshwe.
UMantashe uthe bazobheka ukuthi yimiphi imikhakha yezomnotho abangagxila kuyo ukuthuthukisa ezomnotho.
UMantashe uphinde waveza ukuthi uNgqongqoshe wezokuThuthukiswa koMphakathi, uNksz Bathabile Dlamini, uzofakwa esithandweni somlilo ngenxa yendlela asingathe ngayo udaba lwezimpesheni nokuxabana kwakhe nobeyisikhulu esiphezulu sakwaSassa, uMnuz Thokozani Magwaza, nobenguMqondisi-jikelele, uMnuz Zane Dangor.
UNksz Dlamini ufake uNkk Pearl Bhengu endaweni kaMagwaza, okutholakale ukuthi uNkk Bhengu unebhizinisi nendodakazi kaNgqongqoshe Dlamini.
“Sizolubheka udaba loMnyango wezokuThuthukiswa koMphakathi ngoba kunesidididi khona, sizobheka ukuthi yini edala isidididi.”
UMantashe uthe i-Lekgotla lizophinde libheke ubudlelwano phakathi kongqongqoshe nabaqondisi-jikelele. Kumele kusheshiswe zonke iziphakamiso ezenziwe engqungqutheleni yemigomo eNasrec eGoli.
UMantashe uphinde waveza ukuthi uNgqongqoshe wamaPhoyisa, uMnuz Fikile Mbalula, kuzomele aveze izinhlelo zakhe njengoba libukeka linyuka izinga lobugebengu.