Bazodlulisa izikhalo zabalandeli
BAJABULELA ukuthola ithuba lokudlulisa bukhoma kubadlali izikhalo zabalandeli abaqeqeshi abaqokelwe ukuhola iKaizer Chiefs ne-Orlando Pirates emdlalweni weCarling Black Label Cup ezoba seFNB Stadium kusasa ngo-3 ntambama.
IPirates ijabhise abalandeli ngesizini edlule ihluleka Wukuqeda ku-Top 8. Abadlali bagxekwe ngokungazinikeli ngokwanele ikakhulukazi emuva komdlalo wamanqamu weNedbank Cup ehlulwe kuwona yiSuperSport United ngo 4-1 eMoses Mabhida. IPirates yakhala ngaphansi kuChiefs ngo 2-0 koweCarling nyakenye.
UChief Nkoko (30) waseFree State, ozoqeqesha iPirates, uthe uyalijabulela ithuba elifika kanye empilweni. Wathi uzibona esengumxhumanisi wabalandeli neqembu.
“Ukulandela iPirates kufana nobizo kimina angikukhethanga. Ngisho emuva kokufa ngizoba yisipoki.
“Ngifuna ukuhlala phansi nomqeqeshi nabadlali ngibachazele ngokukhathazeka kwethu. Ngendlela okuyiyona ungathi abadlali badlalela ukuhola, bahambe. Bayazi ukuthi bona bangaya kwelinye iqembu kodwa thina siyohlale sikuPirates.”
Mayelana neqhinga lokuhlula iChiefs uthe: “Ngiyibuke kahle iChiefs, ngiyazi ukuthi emuva babuthaka ngakho sizobaxina khona siyiphoqe ukuthi yenze amaphutha. Siyazi ukuthi injini yabo uKatsande (Willard) iyashesha ukuhluthuka, sizozama ukushesha simcasule ukuze aphume emdlalweni. Ngiyajabula ukuthi uShabba ( Siphiwe Tshabalala) uzobe engekho.”
Womabili amaqembu azodlala indlela ye 4-4-2 okuyiyona eqokwe ngabalandeli.
UManthulane Aphane (36) waseMpumalanga, ozoqeqesha iChiefs, uthe: “Ngiyalibonga ithuba engilinikezwe abeCarling, lisho lukhulu kimina. Kade ngihamba neqembu koMozambique, Botswana nakoWindhoek (Namibia). Ngithole ithuba lokudlulisa izikhalo ngiphinde ngixhumane nabalandeli ngokwenzekayo. Ukuxhumana kulezi zinhlaka siyakudinga kakhulu. Konke ngizokukhuluma neqembu emuva komdlalo okwamanje sisabheke wona.”
Mayelana nendlela yokudlala eyi 4-4-2 uthe iyona elungele iqembu. Ngesizini edlule abalandeli bagxeke umqeqeshi uSteve Komphela ngokudlalisa umgadli oyedwa.
“Ngijabule ngendlela esizodlala ngayo, ikhuthaza ukubambisana kubadlali. Ngiphatheke kabi ngokuthi uShabba akekho kodwa u(Hendrick) Ekstein uzowenza umsebenzi. Sizodlala nePirates esazama ukuhlanganisa iqembu kodwa lokho ngeke sikufake ekhanda. Sizongena enkundleni sidlale ngendlela esihlele ngayo,” kusho u-Aphane.