UPhat Joe ubonga abamesekayo
OBEYIJAJI elibambile ohlelweni lomculo ama-Idols SA, uPhat Joe uthi uyazibonga izincomo azithole kubantu ngemuva kwalolu hlelo.
Kule sizini kwenzeka okungajwayelekile njengoba kufika amajaji ayizivakashi. Lokhu kulandela ukuthi kube nesikhala ngemuva kokuhamba kukaGareth Cliff. Njengamanje amajaji akhona wuRandall Abrahams, Unathi Msengana noSomizi Mhlongo.
NgeSonto bekukhona uPhat Joe ngesikhathi inhlolokhono iseThekwini. Esiqeshini sangeSonto kuMzansi Magic ngo-5.30 ntambama, kuzobe kukhona uKelly Khumalo.
“Ngiyabonga izincomo ezinhle kubo bonke abantu ababukela uhlelo. Ngihlale ngizama njalo ukuthi ngiwakhiphe wonke amangwevu ami futhi ngiyabahlonipha abantu engibasebenzelayo,” kusho uPhat Joe.
Uthe okumnandi kuye wukuthi abantu bayayithakasela imizamo yakhe.
“Ngangimele iKZN ngesikhathi ngikuma-Idols, uma lokhu kuholela ekutheni ngiphinde ngivele futhi ohlelweni, sonke sizohlomula.”
Lo saziwayo usanda kushiya esiteshini saseThekwini lapho ayethula khona uhlelo lwantambama, i-East Coast Drive phakathi nesonto.
Kuleli sonto umemezele ukuthi uyashiya ekwethuleni uhlelo lomgosi lwakuSABC 1, iReal Goboza aqala ukuyethula ngoSepthemba ka-2010.
“Ngimatasa ngezinto ezintsha futhi ngihlunga izicelo ezimbalwa. Uma isikhathi sesifanele, siyokwenza isimemezelo. Okwamanje ngisajabulela ukuphumula nokuchitha isikhathi nomndeni wami.”