Kusolwa owezemfundo ngenkokhelo
BAKHALA ngokungakhokhelwa osonkontileka abenza imisebenzi ethile eMnyangweni wezeMfundo njengoba bethi kuphela ngisho izinyanga ezintathu bengakhokhelwe ekubeni basuke sebewenzile umsebenzi.
Labo sonkontileka bathi kunzima ukwenza umsebenzi nalo mnyango ngoba basebenzisa imali benza le misebenzi kodwa uma sekumele bakhokhelwe kufane nokugqobha itshe ngoba abayitholi ngesikhathi.
Isolezwe likhulume nosomabhizinisi abathathu, abathe benza imisebenzi ebalulekile kulo mnyango kodwa ababili abacele ukungavezwa ukuthi benzani, oyedwa uphakela abafundi ukudla.
Usomabhizinisi ophakela abafundi, uthe wagcina ukuthola imali ngoMashi nonyaka akazi ukuthi kubambephi.
Uthe usebenzise imali yakhe nyanga zonke ephaka kodwa imali angayitholi.
“Usebenzisa imali yakho uthenga ukudla kodwa imali ungayitholi. Awukwazi ukungaziphakeli izingane ngoba uthi awukhokhelwe. Iyinkinga eyokungakhokhelwa ngoba ungena shi ezikweletini,” kusho lo somabhizinisi.
Uthe inhloso ukufukula abamnyama kodwa ibona abalambayo.
Omunye wosomabhizinisi uthe usebenzise enkulu imali kodwa akakhokhelwa.
“Asisazi manje kumele senzenjani ngoba umnyango awukhokhi. Uma uya emnyangweni utshelwa ukuthi imali ibanjwe uMgcinimafa, uma uya kuMgcinimafa utshelwe ukuthi imali ikowezemfundo,” kusho lo somabhizinisi.
Owesithathu uthe kunanezinsolo zokuthi umnyango usuphathelwa imali nguMnyango kaMgcinimafa.
“Kuthiwa kunemali ekhishwa ngumnyango kanye ngenyanga, uma isiphelile umnyango awukwazi ukukhokhela abanye uyoze ukhokhe ngenyanga elandelayo. Lokho kudala inkinga ngoba umnyango unosonkontileka abaningi yingakho kungapheli nokwakhiwa kwezikole.” Ngisho izikhulu zalo mnyango uma zivela ngaphambi kwamakomiti ezemfundo nelezimali esiShayamthetho, indaba yokungakhokhelwa ngesikhathi kosonkontileka ihlale ivela.
Lo mnyango uyaye uzithethelele ngokuthi zikhona izinselelo kodwa uyayilungisa eyokuthi osonkontileka bakhokhelwe zingakapheli izinsuku ezingu-30 benze umsebenzi. Okhulumela lo mnyango, uMnuz Sihle Mlotshwa, uthe bayazilungisa zonke izinkinga ezithinta ukukhokhelwa kosonkontileka.
“Yinto esiyilungisa ngokushesha eyokukhokhelwa kwalabo abasuke benze imisebenzi nomnyango. Ohlelweni lokudla maningi amathuba emisebenzi asakhiwe kulo mkhakha njengoba kuhlomula osomabhizinisi bendawo,” kusho uMlotshwa.
Okhulumela umnyango kaMgcinimafa, uMnuz Sibonelo Msomi, uthe akulona iqiniso ukuthi umnyango wabo usuwengamele isabelo sowezemfundo, wathi uMnyango wezeMfundo uyaziphathela imali yawo.