Kukhuthazwe abantu kowokwethulwa kwenyanga yezokuvakasha
KUGQUGQUZELWE abantu ukuthi bavakashele ezindaweni abahlala kuzona nakwezinye izifundazwe zaseNingizimu Afrika ngaphambi kokuthi baphumele ngaphandle, emcimbini wokwethulwa kwenyanga yezokuvakasha obuseDullstroom, eMpumalanga.
UNgqongqoshe wezokuVakasha, uNkk Tokozile Xasa ehambisana nesikhulu se-SA Tourism bathe kubalulekile ukuthi abantu babe yizivakashi kuleli ngaphambi kokuphumela ngaphandle ukuze kufukulwe umnotho.
“Zibalulekile ezokuvakasha emnothweni waseNingizimu Afrika ngoba zifaka u-3% emnothweni wezwe. Sicela abantu bavakashe ezweni labo, bangajahi ukuya phesheya kodwa bavakashe ezindaweni abahlala kuzo. Indikimba yalo nyaka ithi We Do Tourism. Iyona ecacisa ukuthi kufanele sibe yizivakashi ezweni lethu,” kusho uNkk Xasa.
Uthe banezinhlelo zokuxhasa osomabhizinisi abancane kwezokuvakasha ukuze bathuthuke kanti abantu kufanele bavakashele i-website yakwaSA Tourism neyoMnyango wezokuVakasha ukuthola lonke ulwazi ngamathuba akhona.
Isikhulu sakwa-SA Tourism, uMnuz Sisa Ntshona, sithe akukuhle ukuthi abantu baphesheya bazi izindawo zobumnandi zaselokshini kodwa abakuleli bengazazi.
“Sifuna abantu bazi konke ngamalokishi abo futhi bavakashele namanye. Siqale umkhankaso obizwa nge-5 in 5 wokukhulisa izivakashi ezingena kuleli ngo-5 million eminyakeni emihlanu ezayo. Sifuna abakuleli nabaphesheya kwezilwandle,” kusho uNtshona.
Uthe bakhethe ukwethula i-Tourism Month eqala ngoSepthemba eMpumalanga ngoba ngesinye sezifundazwe ezingavakashelwa kakhulu uma kuqhathaniswa neKwaZulu-Natal, Cape Town neGauteng. Ngonyaka odlule imigubho yezokuvakasha ibe seFree State kwenzelwa ukukhangisa lesi sifundazwe esingenazo izivakashi eziningi kubantu bakuleli nabaphesheya.