Kuyacaca ngodaba lwabafuna ukunakekela izingane
KUNTWELA ezansi ngodaba lwabafuna ukunikwa imvume yokunakekela izingane abangazizali, ngemuva kwesinqumo sakamuva esinqinda amandla iNhloko yoMnyango wezokuThuthukiswa koMphakathi esifundazweni.
UNksz Nokuthula Khanyile usolwa ngokuduvisa izincwadi okumele azisayine ukuze kuphasiswe uhlelo lokunikezela kweminye imindeni izingane ezisuke zingenabo abazozinakekela. Kuthiwa iningi lalezi zingane zisuke zilahlwe emphakathini noma ezikhungweni zikahulumeni.
Kuleli sonto, iNkantolo eNkulu eThekwini inqume ukuthi kungabe kusalindwa incwadi yezincomo zenhloko yomnyango ukuze kuqhubeke uhlelo lokudlulisela ingane emndenini osuke ufisa ukuyinakekela.
IJaji uThemba Sishi likhiphe lesi sinqumo esicelweni esifakwe ngabazali abathathu okungebona abakuleli.
Laba bazali bebekhala ngokuthi kunzima kwabakwamanye amazwe abamhlophe, uma befuna imvume yokunakekela izingane zakuleli.
Basola uNksz Khanyile ngokuhudula izinyawo ukuze bagcine bengaphumelelanga. Yize uhlelo lugunyazwa yinkantolo ilandela iChildren’s Act, bekudingeka ukuthi nenhloko yomnyango isayine incwadi kuqala. Akuqali ukuthi kube nalezi zikhalo njengoba abanye begcine befaka udaba enkantolo ukuze basheshise uhlelo.
Phambilini ephawula ngezinye izikhalo uNksz Khanyile, waveza ukuthi ayikho inhloso yokubambezela uhlelo kodwa basuke belandela umthetho olawula izingane. Waveza ukuthi kwesinye isikhathi izingane zisuke zinabo abazali kodwa bengathintwanga.
Isinqumo seJaji uSishi sibe sematheni esithangamini ebesidingida ngomkhuba wokushushumbiswa kwabantu eThekwini kuleli sonto. Izinhlaka ezahlukene zikhale ngokuthi lesi sinqumo sizokwenza zande izigilamkhuba ezifuna ukuthatha izingane ngalolo hlelo ngenhloso yokuzishushumbisa.
Usonhlalakahle ongagunyaziwe ukukhuluma nabezindaba, uthe kuyiphutha ukuthi uNksz Khanyile umelene nabafuna ukunikwa izingane bakwamanye amazwe.
Uthe kubhekwa kakhulu okulungele ingane, yingakho kumele kucutshungulwe izicelo.
“Kwesinye isikhathi umzali wengane usuke esejahe ukuthi ithathwe, engachazelekanga ngeminye imiphumela yalokho. Ziningi ezinye izindlela asuke engazisebenzisa njengokuthola ikhaya lesikhashana lengane, kusabhekwa udaba lwakhe. Ngenxa yokuthi usuke esejahe ingane ihambe, akabe esakubheka okunye. Ukuhlukana nengane akuyona into encane futhi yinto umuntu okumele ayicababange kahle,” kusho usonhlalakahle.
Okhulumela umnyango uMnuz Vukani Mbhele uthe basasicubungula isinqumo sejaji ngaphambi kokuthi baphawule ngaso.