Abangcwabi bafuna abantu baphile
INKAMPANI yabangcwabi yaseMgungundlovu isiqhamuke nomkhankaso wokugqugquzela abantu ukuthi bazinakekele ukuze baphile yize kunenkolelo yokuthi abangcwabi bafisa ukuthi abantu bashone ukuze bathole ibhizinisi.
UNkk Thandiwe Zamisa okhulumela iKhayelihle Funeral Services uthe umkhankaso wabo uhambisana nomjaho obizwa ngeCemetry to Cemetry Challenge ka-12km, ozosukela emathuneni eThembeni eMgungundlovu uphelele emathuneni eMountain Rise, ngeSonto. Isiqubulo somkhankaso sithi ‘Sibathanda Bephila’. Kukhuthazwa nokuthi abantu bazinakekele ngokwempilo.
UNkk Zamisa uthe uyazi ukuthi kunenkolelo yokuthi abangcwabi bayasizakala ngokushona kwabantu kanti akunjalo.
“Yinkolelo engelona iqiniso. Akekho umngcwabi ojatshuliswa wukushona kwabantu ngoba nebhizinisi lingawa uma kunjalo. Isibonelo nje, kuyenzeka umuntu ashone esanezinyanga ezintathu ebe yilungu likamasingcwabisane, lokhu kushonisa umngcwabi. Abangcwabi bajabuliswa wukuthi abantu baphile ukuze baqhubeke bakhokhe.”
Uthe inhloso yalo mkhankaso ukuqeda lo mqondo wokuthi abangcwabi bafuna abantu bashone nokuthi bafundise abantu ngomsebenzi wabo. Mayelana nokuqala umjaho emathuneni, uthe bahlose ukukhuthaza ukuthi abantu banakekele izindawo zokungcwaba.
“Simangele indlela abantu abazimisele ngayo ukungenela lo mjaho, yize kungajwayelekile ukuthi uqalwe emathuneni uphinde uphelele khona. Sifuna abantu bazi ukuthi amathuna akuyona nje indawo yokulahla abantu kodwa kumele anakekelwe. Lona umsebenzi wemindeni, umasipala nomphakathi ukuze amathuna ahloniphele.”
Kulo mjaho uthe kuvumeleke wonke umuntu angenele, nabangenazo izinhlangano zokugijima. Uthe bafisa umjaho ube minyaka yonke. Akuqali ukuthi bazihlanganise nomjaho, bake baxhasa eminye okubalwa iMaritzburg City Marathon, 100 Capital neMandela Marathon. OwangeSonto uqala ngo-7 ekuseni.