Abaningi bangena enkingeni ngokungalizwa igazi libaxwayisa
NGIBONGA umusa wokuthi ngazalwa ngakhulela endaweni yaseBulwer, eDonnybrook, ngoba lokho kungenze ngaduma ngenxa yokuthi kuzalelwe khona uBongumusa Mthembu oyingqwele yeComrades Marathon. Ngifisa igazi lami lishukume njalo lingalibali ukuthi ngiwumfana wasemakhaya okhule elusa izinkomo nezimbuzi echatha namaselesele. Kuyangithokozisa ukubona uMthembu engawulibali umphakathi waseMbulelweni omkhulisile wamenza waba yile nto ayiyona esihlonishwa umhlaba wonke.
MaSolezwe uVolos akasiyena umdali nombumbi wegazi lakhe kodwa ufisa igazi lakhe likhulume alizwe ukuthi lifuna enzeni. Kuyiqiniso elingephikwe ukuthi abantu abaningi bazithola sebengene ezinkingeni ngenxa yokuthi abalizwa igazi uma libaxwayisa ngobungozi bezinqumo abazithathayo. Njengoba kunesisho esithi igazi lomuntu liyakhuluma angikholwa wukuthi kukhona igazi lomuntu eliyisimungulu elingakhulumi. Isikhathi esiningi abantu babuka izinto basebenzise umqondo nenhliziyo balibale wukuthi igazi linezindlebe liyezwa. Kunabantu asebasinda ezimeni eziyingozi ngenxa yokuthi balalela igazi, uma bezwa ukuthi igazi alivumi bayayeka ukwenza into ngoba basuke sebazi ukuthi ayihambisani nabo.
Bakwethu indaba yegazi ijulile, uma kukhulunywa ngayo akufanele abantu bashiselwe igazi ngoba kungaholela ekutheni kuchitheke igazi kungafanele. Kuyiqiniso okufanele lamukelwe ukuthi kunabantu abashiselwa yigazi isidalo sabo, labantu uthi uyabadlalisa uxoxa nabo ubabone sebediniwe sebefuna ukulwa balimaze abantu. Abantu abanenkinga yokushiselwa yigazi badinga ukusizwa bafundiswe amasu okuthi igazi lipholiswa kanjani ngoba ligcina selibafake emajele sebebulele abantu. Kuyiqiniso nokuthi kunabantu abanegazi elibandayo elibenza baficwe amathonsi abanzi abengafanele abafice. Uthole ukuthi umuntu uzungezwa yisimo esiyingozi kodwa umbone ezikhululekele kungathi akonakele lutho, uma esehlelwa yisehlo esibi umbone esekhihla isililo kungathi wehlelwe yisehlo esingamkhombisanga ukuthi sizomehlela.
MaSolezwe uVolos akasho ukuthi ayikho into okuthiwa wukuxegelwa yisimilo emhlabeni kodwa uthi akungalitshalwa wukuthi umuntu ulawulwa yigazi lakhe. Kuyiphutha ukuthi kukhulunywe kabi ngomuntu wesifazane othanda amadoda kuthiwe uxegelwa yisimilo. Umuntu wesifazane uma ethanda amadoda usuke engazenzi kodwa kusuke kuyigazi lakhe elilula elingakwazi ukumelana nesithunzi somuntu wesilisa. Kanjalo nomuntu wesilisa othanda abesifazane akufanele agxekwe ngoba usuke enegazi elibukhali elifuna ukuthuntubezwa wukusondela kumuntu wesifazane.
Kwabona ubushimane nobusoka abukho olimini lomuntu wesilisa, uma indoda iyisishimane isuke inenkinga yegazi elibi, kanjalo nendoda eyisoka isuke inenhlanhla yokuthi idalwe yaba negazi elihle elithandwa ngabesifazane. Wonke umuntu ophilayo unegazi kodwa umehluko usekutheni igazi lakho linalo yini ugazi olwenza uthandeke. Angikhathali ngisho ungaba nemali engakanani kodwa uma igazi lakho lingenalo ugazi akekho umuntu ofuna ukuzisondeza kuwena. Kungenxa yalesizathu kufanele umuntu nomuntu akhulekele ukuthi emzimbeni wakhe kuntininize igazi elinogazi elizokwenza athandeke emehlweni abantu.
Umuntu nomuntu kufanele azinikeze isikhathi sokuthi akhulume negazi lakhe alincenge alitshele ukuthi ufisa lisebenze kanjani emzimbeni wakhe. Mina nje angilibali ukuncenga igazi lakaMemela eligijima emithanjeni yami ukuthi lintweze imini nobusuku lingadinwa opelepele noshukela bakoGambu. Kanjalo negazi lobuZulu eligijima emzimbeni wami ngifisa lingapholi ngize ngizizwe sengifikelwa wumoya wokuzibukela phansi uma ngiziqhathanisa nezinye izizwe. Kangilibali nokucela amaketanga okubopha igazi lami lingembathi inzondo nomhobholo owenza ngingaziboni izinto ezinhle ezenzeka emhlabeni.