Kufanele ihluke indlela yokuziphatha kodokotela
IZINDABA ezithinta impilo kaMadiba zisalokhu zisematheni yize engasekho emhlabeni ngoba wayengumuntu onogazi olumangalisayo. Impilo kaTata ibe nedumela esejele kanti lokhu kwaphindaphindeka ngesikhathi esephumile, engumengameli nangesikhathi esethatha umhlalaphansi ngoba wayesaqhubekile nokuba matasa futhi kwabaningi abaqhamuka emazweni angaphandle kwakuyiphupho ukuhlangana naye.
Ngakho akumangalisi ukubona isasasa ngencwadi yakamuva ebhaliwe ngempilo kaMadiba, iMandela’s Last Years ebhalwe ngowayengudokotela wakhe, uDkt Vejay Ramlakan. Le ncwadi osekuhoxisiwe ukudayiswa kwayo ngenxa yesikhalo esikhishwe ngumkaMadiba, uNkk Graca Machel, iNelson Mandela Foundation nabanye abazukulu bakaMandela ibiveza imininingwane yokugula kukaTata nokwezeka ngaphambi kokuthi ashone. Abayigxekayo bathi lo dokotela akayitholanga imvume emndenini yokushicilela le ncwadi kanti okukhulu okukhalwa ngakho ukwephula kwakhe umgomo olawula ukusebenza kodokotela mayelana nobudlelwano aba nabo nesiguli ikakhulu uma kukhulunywa ngokudalula ukuthi isiguli siphethwe yini.
UDkt Ramlakan uwephulile lo mgomo futhi akukhathaleki ukuthi nguMadiba lona okukhulunywa ngaye, akushintshi ukuthi yena ungudokotela futhi imithetho ayiguquki noma ngabe isiguli ngubani.
Kuyacaca ukuthi uDkt Ramlakan wakusebenzisa ukungazwani komndeni kaMadiba njengoba ethi bakhona abamnika imvume kodwa engaphumeli obala ngokuthi obani labo.
Cishe lukhulu abebevumelene ngalo nalabo “abamnika imvume” ngoba akungatshazwa ukuthi inkulu imali ebizokwenziwa ngokudayiswa kwale ncwadi futhi cishe inkulu vele aseyitholile ngesivumelwano asenze nabashicileli bayo.
Ingozi ehlale ikhona ngabantu abazithola besebenzela abantu abafana noMadiba ukuthi abanye babona ukusondelana nabo njengendlela esheshayo yokuzenzela imali. Yebo bakhona abanye asebeke babhala izincwadi ezikhuluma ngoMadiba kodwa indlela yokuziphatha kodokotela kufanele ihluke ngoba owabo umsebenzi awufani nabanye, akufanele sivume ukuthi isithunzi salo msebenzi sidicilelwe phansi ngoba nakhu nje isiguli kungumuntu odumile.