Baphela abantu bakithi yizinyanga mbumbulu

MHLELI: Ngithi angizwakalise ukukhathazeka ngabantu bakithi. Ngikhala ngezikhangiso ezigcwele emaphepheni ethu esiwathanda kakhulu.

Izinyanga mbumbulu aziyeke ukudlala ngabantu ngoba nakhu behluphekile. Zithembisa abantu izigidi, zithi uzozithola bese ukhokha usuyitholile le mali. Agijime umuntu ezwa lokho emva kwalokho kuthiwe abadala bathi khokha u-R700, uwukhokhe. Kuthi kusuka lapho kuthiwe sebethi khokha u-R600, uwukhokhe. Kudlule lapho kuthiwe sebethi manje imali inkulu kakhulu iwu-R3million ngakho khokha u-R1 500. Ibalwa imali ize ufike ko-R4000 ngoba phela wethenjiswe izigidi. Bathi izolethwa otokoloshe, amagundane, izovele ingene ebhange noma izogcwala endlini.

Kahleni bakwethu musani ukudlala izinyanga mbumbulu, uthola ukuthi nalowo muntu othi uzothola izigidi ngumadakeni nje, awusazibuzi nokuthi kanti labo tokoloshe yena abamthumeleli ngani imali. Sebephelile abantu bakithi. Bathathe abantu bathi abaqambe amanga bathi bona sebake basizakala besho amanga wodwa.

Kodwa-ke uma usucabanga kahle laba bantu abadala uthi bathi abakwabani? Abantu bakithi kwaNdlovu bangasuka bayokhuluma noMjomvu, Mkhulu Majiga, ubaba ABU, babaZar, Dr. Pelela, noma kuMama ITU? Kahleni bantu bakithi, sesiphelile wubugebengu ezweni lakithi. Imali siyisebenza kanzima kangaka bese kuthiwa kukhona evele elethwe amagundane. Ukube kukhona lokho phela ngabe akekho noyedwa osebenzayo.

Ngiyaphinda futhi ngithi ayikho into enjalo, akasho phela othi mina sengake ngalethelwa amagundane notokoloshe imali.

Izikhangiso zigcwele iphepha, bayazi ukuthi umuntu omnyama uma umbambe ngemali uza egijima, sebephelile abantu wobaba nomkhulu Ndlovu. Zakheleni MLAZA