IZINKONDLO

Ngigayele Ngizothe Ngembathis’ amaqabunga ngizothe, Ngibe mibalabala njengengwe yasemaqeleni,

Ngikhonkosele kwabasaqub’ esibelethweni senzalabantu,

Hleze bazothe lapho befika kowenhlupheko. Sondela salukaz’ esimabhadubhadu, Ngikhongozel’ ubuhlakani bendalo, Hleze kuqhans’ imithambo yenjulalwazi,

Ngikhanyisel’ abamixhiliba ngamathamb’ engqondo

Ngikhanyisel’ abaminenke ngebang’ abasazolicathula,

Ngikhuthaz’ asebaya kwagoqa nyawo ngengunaphakade.

Zululeka ngqondo yomkhovu waseNtshonalanga

Ufun’ ikhambi lokwelaph’ ubuwula bezazi zaseNtshonalanga

Ezasephuc’ umnkantsha wesiko likaNomkhubulwane. Ngigayele ngizothe nyanga yezulu, Kuqhans’ imithambo yokuzazi Lapho ngincind’ odengezini lusentendeni yesandla.

Sengophephela kuz’ izaqheqhe zaseSandlwana Ezagwaz’ amaNgisi ngensizi yosizi Kwaqhum’ isibeletho seNdlovukazi Iqhwakel’ esihlalweni sombuso oxegaxegayo,

Uxegaxega ngokuqonel’ iziqhaza zakwethu. Siyadel’ leso sihlalo sobukhosi Okwaqhumela kus’ isibeletho seNdlovukazi

Kwachithek’ uphoko kuvel’ iNgonyama yamaZulu. Sengiyozizekel’ amagwabab’ echobana Ezokuy’ esikhathini kweNdlovukazi singakafik’ isikhathi.

Sabalalani ngemicabango mahlumel’ esizwe,

Nithol’ ingonyuluka ngomthombo wenhlakanipho, Nithob’ amanxeb’ ezisulu zokungazi, Azaz’ ukuth’ azaz’ iziphukuphuku zamambuka,

Azaz’ ukuth’ ukulahl’ ulimi lwazo kuwubunuku, Ubunuk’ obedlul’ iphunga leqaqa. Seziyosengwa yinkehl’ inkosi ngiqinisile,

Izingane zakwethu zinyundela olukaPhunga noMageba Lapho ziqomisa ngolwamaNgisi. Salukazi sakwethu, khuz’ umhlola wezinkothangqoko!

Sekuyolamul’ ukuzigqaja kwamabhinc’ anjengathi, Sekuyoqhum’ imbewu yamathwasa, Amathwas’ angesab’ ukukhwifa ngolwawo bethefuya. Qhawekazi - Bongani Mavuso Sithandwa senhliziyo yami, Ungenzele konke ntombi kaGubhela, Lafezek’ iphupho likaMdali, Lokungikhulisa ngemfudumalo. Nakuba besikhungethwe ubuphofu kwethu,

Usikhulise ngothando nenhlonipho. Qhawekazi lakwethu, Mama weqiniso kwethu, Awuzang’ ukugqize qakal’ ukuhlukunyezwa kwakho,

Abantu befun’ ukudicilela phans’ okwakho;

Usihlenge njengesikhukhukazi sivikel’ amatshwele aso,

Lavel’ iqinis’ elith’ uyimbokod’ uqobo lwayo. Mama ngilapha mama, Ngiphethe’isihlonti sempumelelo ngenxa yakho, Abangangami bafis’ ukusihlwitha Ngisale ngingenaw’ umkhombandlela wempumelelo. Mama nginawe mama, Abangakithi baningi kunabangakubo, sizonqoba! - Lethiwe Mthimkhulu