Akuhlonishwa noma ngubani ngomngcwabo wombuso
KUKHONA ingoma ejwayele ukuculwa abazalwane ethi iZulu Liyasetshenzelwa. Iqhubeka ithi eZulwini akungenwa mahhala okuchaza ukuthi yimisebenzi yakho emihle obuyenza emhlabeni usaphila ekukhulumelayo okuyiyona ekungenisa ezweni lesethembiso.
Le ngoma ifakazela okwenzeke kumculi uRay Phiri ohlonishwe ngomngcwabo osezingeni likahulumeni.
Sekukaningi ukuthi uma kushone usaziwayo kuthiwa uzohlonishwa ngomngcwabo osezingeni likahulumeni.
Miningi imibuzo ebuzwa amalungu omphakathi ngalolu hlobo lomngcwabo, eminye yayo ithi abanjani abahlonishwa wuhulumeni ngalolu hlobo lomngcwabo nanokuthi ngabe uhulumeni akakhethi yini iphela emasini.
Ngokujwayelekile bekwaziwa ukuthi abantu abahlonishwayo yilabo abayibamba emzabalazweni kuphela nezinye izikhulu zikahulumeni.
Muva nje sekubonakala nosaziwayo sebehlonishwa ngomngcwabo osezingeni likahulumeni.
Omunye walabo saziwayo wuRay Phiri obalwa nezinkakha zomculo obehola iqembu lodumo iStimela.
UPhiri ungcwatshwe ngoMgqibelo odlule. Umngcwabo wakhe ubusingethwe wuhulumeni wesifundazwe iMpumalanga, lapho edabuka khona.
Okwaqapheleka kuloya mngcwabo wukuthi wahlukaniswa izigaba ezimbili. Isigaba sokuqala kwakungesomphakathi, kukhuluma abangani, izihlobo nabomndeni kamufi. Kwakushaywa nengoma kwazise ubengumculi.
Esesibili kwasekubusa abombutho wamaphoyisa, yize uPhiri ayengelona.
Kuthintwa uMnuz Ndabezinhle Sibiya okhulumela ihhovisi likaNdunankulu waKwaZulu-Natal, uthe ayibhekwa indaba yepolitiki uma kuzohlonishwa umuntu othile ngomngcwabo osezingeni likahulumeni.
“Lolu hlobo lomngcwabo alunikwa noma ubani. Lunikwa abantu abalisebenzele izwe, kungaba amaciko, osopolitiki kungakhathalekile ukuthi abakuliphi iqembu. Ngokujwayelekile, kuyaye kufakwe isicelo sokuthi umbuso ube nesandla kulowo mngcwabo womuntu othile obelisebenzela izwe lakhe nowenze umehluko nokungaba yisemphakathini. Leso sicelo sidingidwa yikomiti okusuke kukhona kulo noNdunankulu.
“Leso sicelo sibe sesidluliselwa kuMengameli wezwe okunguye othatha isinqumo ngokuthi ngabe lowo muntu ukufanele yini ukuhlonishwa ngomngcwabo osezingeni likahulumeni,’’ kusho uSibiya.
Uthe isizathu sokuthi kube abombutho wamaphoyisa abaphatha inkonzo yomngcwabo yingoba uma kukhulunywa ngombuso, uthinta nezokuphepha nokuvikela, okungamaphoyisa. Yiwona amqoka ezweni.
“Uma sekungena isigaba sesibili enkonzweni yomngcwabo, kusukuma uNdunankulu waleso sifundazwe adlulisele izintambo kuKhomishana wamaphoyisa okuwuyena omemezelayo ukuthi manje umngcwabo usuphethwe wumbuso,’’ kusho uSibiya.
Kuleso sigaba esishiywo wuSibiya, ibhokisi likamufi libe selisongwa ngefulegi laseNingizimu Afrika. Nomfundisi obe esehola inkonzo yomngcwabo usuke ephuma embuthweni wamaphoyisa.
Kuba nebhendi yawo esuke iwushaye waphelela umfaniswano wombutho.
Kuculwa neculo lezwe uNkosi Sikelela i-Afrika.
Abanye abantu abahlonishwa ngomngcwabo osezingeni likahulumeni wuSenzo Meyiwa owayengunozinti we-Orlando Pirates neqembu lesizwe iBafana Bafana, Mbulaeni Mulaudzi owayengumgijimi wakuleli owabuya nendondo yesiliva kuma-Olympic, Sfiso Ncwane obengumculi wowokholo.
Ezemingcwabo zidlulisa amazwi enduduzo emndenini kaMnuz Ronnie Mamoepa obekhulumela iPhini likaMengameli wezwe uMnuz Cyril Ramaphosa.
Kulabo abafihla izihlobo zabo kule mpelasonto, uNkulunkulu akabasingathe kulesi sikhathi esinzima.
Asihlangane ekhasini lethu kuFacebook. Isolezwe Ezemingcwabo.