Ukhala ngabafuna ukubaqothula ngabadlali
IPHINI lomqeqeshi weMamelodi Sundowns, uRhulani Mokoena, likhala ngamaqembu afuna ukuxebula umkhoma kumaBrazilians uma ebadayisela abadlali.
ISundowns izakhele udumo ngokungena ishone ephaketheni uma ifuna umdlali nokuholele ekutheni igxekwe ngamanye amaqembu abesala encela izithupha ngenxa yokugodola nemali. Isemkhankasweni wokuqinisa isikwati sayo ngaphambi kokuqala kwesizini ka-2017/2018. Nokho kusukela kuvule iwindi lokusayinisa abadlali, iSundowns ayikasayinisi noyedwa umdlali, kunalokho kunabadlali asebeshiyile, uTeko Modise osejoyine iCape Town City noWayne Sandilands osezovimbela i-Orlando Pirates.
UMokoena oyiphini likaPitso Mosimane benoManqoba Mnqithi, uthe umlando wokukhipha imali enkulu bethenga abadlali yiwona owenza amaqembu ayinyuse intengo uma kukhuluma bona. Emasontweni adlule kuvele ukuthi i-Ajax Cape Town ifuna u-R30 million ngoRivaldo Coetzee neMaritzburg United ifuna umthamo obhekile ngoBrian Onyango waseKenya. ISundowns isanda kudikila uDeolin Mekoa wayo i-United ngenxa yokumba eqolo.
“Kunzima emakethe uma ubheka okwenzekayo, ngisho phesheya kwezilwandle, amaqembu asenemali aseyakwazi ukugcina abadlali bawo abaphambili. Lokhu kungenxa yomhlomulo wePSL, amaqembu awasazitholi ephoqekile ukudayisa. Angabeka noma yimalini ekhanda lomdlali omfunayo, kukuwena ukuthi uyakwazi ukuyikhipha.Ngebhadi kunzima ukusho intengo yomdlali, kuya ngokuthi wena ubona imfanele yini leyo mali,” kusho uMokoena.
“Kwamanye amaqembu imali incane. Kwamanye inkulu emakethe ngenxa yobukhulu beqembu nomlando. Kunzima kuSundowns ngenxa yokuba nomengameli nomphathi weqembu esinaye, abantu abaningi banyusa intengo yabadlali babo. Lokho kwenza kube nzima kithina ukuncintisana emakethe ngoba intengo ayifani.”
Imenenja yeKaizer Chiefs, uBobby Motaung, ihlezi ekhala ngokuthi amaqembu anyusa imali yabadlali ngokweqile uma kungaMakhosi afuna ukuthenga. ISundowns igcine ukushaya iphakethe ngesizini edlule ithenga uSibusiso “Villa” Vilakazi kuBidvest Wits obekuhiwa ubiza imali engaphezu kuka-R10 million. “Siyafuna ukuqinisa isikwati, silahlekelwe ngabadlali abawukhiye abafana noKeagam Dolly noBongani Zungu izikhala zabo ezigcine zingavalwanga. Kuwumsebenzi wawo wonke amaqembu amakhulu ukuthi aqinise izikwati. Sibheka nokuthi umdlali uzokwazi yini ukumelana nokudlalela iSundowns ngaphambi kokubheka ukuthi imfanele yini imali efuneka ngaye,” kusho uMokoena.
Khona manjalo uDumisani Zuma obegijima kwiBloemfontein Celtic umenyezelwe yiChiefs njengomdlali wayo omusha. UZuma ngomunye wabadlali abebemataniswa neSundowns kwaze kwabikwa ukuthi usedube ukujima neCeltic ngenxa yalokhu.