Ithuba leChiefs nePirates kweyeCaf
IZINYEMBEZI zabalandeli beKaizer Chiefs nabe-Orlando Pirates emuva kodaka olushaywe yizinkunzi zaseSoweto ngesizini ye-Absa Premiership edlule zingase ziphenduke injabulo ngemuva kwesimemezelo sikamengameli weSafa, uDanny Jordaan, asenze ngezinguquko eziza ebholeni lase-Afrika.
Ngokusho kukaJordaan, sekuvunyelwene ngakho konke ukuthi kusukela ngokuqala kwesizini ezayo yemidlalo yeCaf, amazwe iNingizimu Afrika ne-Egypt asezomelwa ngamaqembu amane kwiCaf Champions League. Lokhu kuvunyelwane ngakho kukhukhulelangoqo womhlangano ngebhola laseAfrika obuseRabat, eMorocco, ngesonto eledlule.
Lokhu kuchaza ukuthi ompetha beligi iBidvest Wits, Mamelodi Sundowns, Cape Town City neChiefs yibona abazomela iPremier Soccer League (PSL) kulo mqhudelwano.
Eminyakeni edlule iPSL ibimelwa ngamaqembu amabili kwiChampions League kodwa ngemuva kwalo mhlangano weCaf konke lokhu sekuzoshintsha. Okungakacaci nokho wukuthi obani abazodlala iCaf Confederation Cup.
NgokukaJordaan, imidlalo yeCaf isizoqala ngoAgasti kuya kuMeyi njengoba kwenziwa emaligini amakhulu ase-Europe.
Ibamba lesikhulu esiphezulu kuPSL, uMato Madlala, lithe
nabo balindele iSafa ukuthi ibatshele ukuthi kuzohlanganwa nini futhi yini ezobe idingidwa.
“Nathi sisafana nawo wonke umuntu okwamanje silindele iSafa ukuthi isinike umhlahlandlela. Nanamuhla (esho izolo ekuseni) sizohlangana nayo ithi ukusicacisela ngokuzokwenzeka. Asikazi ngisho ukuthi yini okuyokhulunywa ngayo ngakhoke nombuzo wakho ngabazodlala kuConfederation Cup angikwazi ukuwuphendula. Sizozwa ngeSafa bese silandela lokhu ekushoyo,” kusho uMadlala.
Okucacayo ezinkulumeni zikaJordaan wukuthi iCaf ifuna ukusika iphethini kumaligi ase-Europe ngakho-ke njengoba amaqembu amane ezodlala kuChampions League, elilale isihlanu nelisendaweni yesithupha yibona okumele bayodlala kuConfederation Cup. Uma kunjalo kusobala ukuthi iPirates ingazithola isiyodlala kulo mqhudelwano ngoba iSuperSport United eyishaye kowamanqamu weNedbank Cup iqede isizini isendaweni yesihlanu ku-log. Uma kungenzeki lokhu, kungabonakala iPolokwane City ngoba yona ilale isithupha.
Phambilini iConfederation Cup ibigijinywa yiqembu eliqede endaweni yesithathu ku-log nelinqobe iNedbank Cup.
Uma iqembu elidle iNedbank livele liqede kwamathathu aphezulu ku-log, elihlulwe kowamanqamu yilona ebelithola indawo.
Nokho ngaphambi kokuthi abalandeli beChiefs nePirates babhiyozele lezi zindaba, bazobe beseka amaqembu abo koweCarling Black Label Cup kusasa eFNB Stadium. Umdlalo uzoqala ngo-3 ntambama kanti amathikithi akhona adayiswe aphela. Izikimu zimi kanje Kaizer Chiefs XI: Khune, Mphahlele, Tower, Gordinho, Masilela, Ekstein, Katsande, Maluleka, Lebese, Parker noPaez.
Orlando Pirates XI: Mpontshane, Matlaba, Jele, Gcaba, Phungwayo, Makola, Manyisa, Sarr, Memela, Gabuza noNdoro.