Bazobhuquzisana obhuqwini kowezimoto
BANETHEMBA lokwenza kahle emjahweni iHarrismith 400 ngempelasonto abashayeli be-ATS Motorsport Young Guns.
Laba bashayeli uRichard Leeke noHenry Köhne baya kulo mjaho wesigaba iClass S kwiSouth African Cross Country Series ngemuva kokunqoba kwiVW Rally.
Manje sebeyipakile iFord Fiesta yabo futhi sebezongena kwiFord Ranger edonsa ngamasondo amane.
Ukugcina kwabo ukushayela lo makhandakhanda kwakusemjahweni iBotswana 1000 Desert Race emasontweni edlule.
Babeqala ukushayela kulo mzuliswano omude futhi bagcina bengawuqedanga ngenxa yokuphantshelwa ngamasondo. Emzuliswaneni wesibili womjaho ngakusasa bagcina bephuma endaweni yesibili esigabeni sabo.
“Kwaba yisifundo esinzima eBotswana kodwa sifundile manje,” kusho uLeeke.
“Babengadlali uma bethi wumjaho omude futhi umzuliswano wokuqala wahamba kabi, saba nebhadi ngokuphantshelwa ngamasondo. Emzuliswaneni wesibili sabe sesishintshile ngokomqondo futhi kwasisebenzela,” kusho yena.
Uthe abakagudluki ephusheni labo leCross Country kulo nyaka futhi eHarrismith kuzobe kuwumjaho wabo wesine obhuqwini.
“Yize kunjalo kodwa siyathemba ukuthi ijubane nokuzimisela kwethu kuzosisebenzela yize singenaso isipiliyoni kulolu hlobo lomjaho.”
Umjaho uzobe use-Eeram Farmers Complex ngaphandle kwaseHarrismith. Abazobe bengenele bazoqala ngomjaho ongu45 km wokuhlela ukuthi izimoto zizoqala kanjani namhlanje ngo-2. Kusasa umjaho uqala ngo-2 kanti uzobe ugijinyelwa emzileni ongu-200 okumele uhanjwe kabili.