Kuzohanjelwa izindawo ezinobugebengu
ZIZOHLALA obala izindaba zamaphoyisa nezokuvikelwa kwabantu KwaZulu-Natal, uma ikomiti elibhekelele ezamaphoyisa ePhalamende selihambela izindawo ezehlukene ezinezinga eliphezulu lobugebengu kuleli sonto.
Namhlanje uSihlalo wekomidi lamaphoyisa ePhalamende, uMnuz Francois Beukman, uzobe eseRichards Bay kanti uthe bakhethe ukuza KwaZulu-Natal ngoba yisifundazwe esinoKhomishana wamaPhoyisa osabambile, uMajor General Bheki Langa.
“Sifuna ukubona ukuthi uziphethe kahle yini ezokuphepha uKhomishana wamaphoyisa osabambile. Sizobheka nokuthi amaphoyisa asezindaweni ezisemakhaya ahlinzekwe ngezinsiza ezifanayo yini nozakwabo abasebenzela emadolobheni,” kusho uBeukman.
Bazophinde bafune izimpendulo ngezinsolo ezivele kwikhomishini ephenya ngodlame lwaseGlebelands eMlaza eholwa ngu-Advocate Marumo Moerane.
Ikhomishini kaMoerane iveze ukuthi kunamaphoyisa athintekayo odlameni lwaseGlebelands kanti sekuze kwaboshwa amabili.
“Ayikho into esingeke siyiphenye ethinta ukuphepha komphakathi nokusebenza kwamaphoyisa KwaZulu-Natal. Sifuna ukubuyela ePhalamende sinesithombe esicacile ngokwenzekayo. Sizolubheka nodaba lokuphenywa kwamacala odlame olubhekiswe kwabesifazane nezingane ngoba kubalulekile ukuthi uma abantu beyobika amacala alolu hlobo bazizwe bemukelelekile,” kusho uBeukman.
Uthe ngeke bayishiye ngaphandle iChatswoth ethathwa njengesizinda sezidakamizwa kanti ezinye iziteshi abazogasela kuzo ngeke bazisho.