IBucs iguge iphakethe ngoNyatama
IGUGE iphakathi i-Orlando Pirates ithenga umdlali weBleomfontein Celtic uMusa Nyatama.
Ngesonto eledlule iPirates imemezele uNyatama njengomdlali wayo omusha. Lo mdlali oyibamba enkabeni yenkundla usezoyihlikihla kweZimnyama ngesizini ezayo.
Umthombo weSolezwe ongaphakathi kwiSiwelele utshele leli phephandaba ukuthi iBucs iguge iphakethe ngesikhathi ithenga uNyatama.
“Isinqumo sokudedela uNyatama besihambisana nokucabangela ibhizinisi. ICeltic ibifuna ukumgcina kodwa ibone kahle ukuthi ngeke ikwazi ukuyeka isamba semali esibekwa yiPirates. IPirates ihlukane no-R5 million. Empeleni iPirates iqale yafuna u-Alfred Ndengane kodwa iCeltic yanqaba ngoba isafuna ukumsebenzisa. KuMusa babonile ukuthi yize besamdinga kodwa ngeke balahlekelwe kakhulu ngoba neminyaka yakhe isihambile,” kusho umthombo.
UNyatama (29) useke wayibamba eqenjini elikhulu phambilini. Wayegijima kuMamelodi Sundowns engompetha beCaf Champions League ngaphambi kokuwelela kwiSiwelele.
KwiPirates kubhekwe ukuthi afike ayibambe noThamsanqa Sangweni no-Oupa “Ace” Manyisa enkabeni yenkundla.
Ungenile enkundleni ngesiwombe sesibili iPirates ibhekene neKaizer Chiefs koweCarling Black Label Cup ngempelasonto.
Umqeqeshi weBucs uKjell Jonevret, usale ethathekile ngalo mdlali noThami Sangweni.
“Nabadlali ababili abasha bakhombisile ukuthi bazongena khaxa egiyeni. Kuningi okuhle okwenzekile kulo mdlalo noma sihluliwe. Sinamasonto amathathu okuzilungiselela, ngiyathemba ukuthi sizobukeka singcono uma sekuqala isizini,” kusho uKjell.
Umqeqeshi omusha weCeltic uVeselin Jelusic uthe ngeke akwazi ukudalula indaba yemali yize kubuhlungu ukuthi umdedele uNyatama.
“Siyaxolisa kubalandeli ngokudedela laba badlali. Sikuqonda kahle futhi ukuthi ngeke kube lula ukuvala izikhala zabo. Bobabili (esho noDumsani Zuma ojoyine iKaizer Chiefs) siyazi ukuthi ngeke zivaleke kalula izikhala zabo. Sibafisela inhlanhla lapho beya khona,” uJelusic.
Usihlalo weZimnyama u-Irvin Khoza umatasa njengoba kuvulwe iwindi lokudayiselana ngabadlali.
Ngesizini edlule iPirates ishaye udaka iqeda isizini ingekho kwiTop 8. Phezu kwalokho ithelwe ngehlazo lika4-1 kowamanqamu weNedbank Cup eMoses Mabhida Stadium ngenyanga edlule.