Akukapheli ngoDJ Bongz neMabala Noise
PHEZU kokuthi uDJ Bongz abhala ekhasini lakhe leTwitter emasontweni edlule ukuthi akasekho eMabala Noise Entertainment, sekuvele ukuthi i-albhamu yakhe entsha izophuma kule nkampani.
Ngokuthola kwaleli phephandaba, uBongz wathumela i-email ebusuku kungasekho muntu ehhovisi leMabala Noise ecela ukukhululwa enkontilekeni yakhe.
Ngakusasa ekuseni wabhala kuTwitter ukuthi useshiyile. Owayekhulumela iMabala Noise, uMhlo Gumede, wathi abayazi eyokushiya kwakhe.
UDJ Bongz uthe inkontileka yakhe isamkhomba eMabala Noise yingakho ezokhipha kuyona.
“Kune-albhamu okumele ngiyikhiphe khona. Engakusho kuTwitter ngiyobuye ngikuchaze. Kusamele sihlale phansi neMabala Noise sikhulume sibone ukuthi yikuphi lapho konakele khona. Ubonile nawe ukuthi izinto ziyalungiswa futhi kube nezinguquko,” kusho uBongz.
Uthe i-albhamu useyiqedile futhi uyinikeze imenenja yenkampani uSikhulile “Squiks” Nzuza ngoMgqibelo.
USquiks ukuqinisekisile ukuthi uyitholile i-albhamu kaBongz entsha wathi kodwa usaya emhlanganweni ucela ukunuye athintwe. Esethintwa ucingo bese lukhala lungabanjwa.
UBongz uthe njengoba noMampintsha eneWest Ink ekubeni esayine e-Afrotainment, naye uneGwaragwara Entertainment.
UBongz usanda kukhipha ingoma ethi Ngikhulile kuyo uNokwa.
“Ngisebenze nabantu abaningi njengeDBN Nyts, Tira, Moneoa, KT waseGoli, nophrojusa abancane abasakhula, Masandi owayekwiCashtime noDogynites waseNigeria,” kusho uBongz.
Uthe ubuyele esigqini sakhe sakudala azakhela ngaso udumo ngengoma ethi Thina Sobabili.
“Ngibuyele kuleso sitayela ngoba akekho omunye osishayayo. Abantu bazozwa ukuthi ngisukaphi. Ngizelwe kabusha,” kusho uBongz.
Uthe i-albhamu ayishayi ngesigqqi se-house kuphela kodwa kukhona nesakwamanye amazwe ase-Afrika.
“Kunezingoma okungathi ezoDavido ngoba sifuna ukuthi umculo wethu usabalale. Sengingaya noma yikuphi phesheya ngiyodlala.” apike