Bayazihlangula emathikithini awombombayi
ABAKHIQIZA amathikithi okubuka imidlalo ehlukene iComputicket bayazihlangula emathikithini angombombayi okusolwa ukuthi abe yimbangela yokunyathelana okudlule kukho imiphefumulo emibili ngoMgqibelo eFNB Stadium, emdlalweni weCarling Black Label Cup.
Yize bezihlangula kodwa uJacques Grobbelaar, oyimenenja yaseFNB Stadium, uveze ukuthi banabo ubufakazi obuzocacisa ukuthi abantu babefuna ukungena ngesankahlu enkundleni ngemuva kokujikiswa ngenxa yamathikithi abo angekho emthethweni.
Le ndaba yamathikithi angumbombayi iphinde yavela nasesithangamini nabezindaba izolo ebesibizwe nguSihlalo wePirates, uDkt Irvin Khoza, noSihlalo weChiefs, uKaizer Motaung. Womabili amaqembu acele ukuba ame eceleni abuke konke okuzokwenzeka ngoba okwenzekile kwenzeke kudlala wona.
UKhoza uthe bacele iPremier Soccer League (PSL) ukuba iqashe noma ubani embona ukuthi usemnkantshubomvu kwezokuphenya ukuze kucace ngokwenzekile. Ngokwencwadi efundwe nguKhoza athe uyibhale noMotaung, kumele zingapheli izinsuku eziwu-14 uphenyo lungaqediwe ngoba ukuhamba kwesikhathi kuzokona izinto futhi kunemindeni efelwe edinga izimpendulo.
UMotaung uthe kubuhlungu okwenzekile futhi bazosondelana nemindeni uma isikhathi sesivuma.
“Ikhona futhi nemizamo yokuhlela inkonzo yesikhumbuzo kodwa nakho lokho futhi kuzocaca kahle ngokuhamba kwesikhathi,” usho kanje uMotaung.
Oyedwa walaba abashonile udalulwe ngelikaPrince Chauke osegatsheni laseSabie. Kuvele ukuthi ungumshayeli wetekisi waseLimpopo futhi ubengumlandeli weChiefs. Owesibili lisagodliwe igama lakhe ngoba umndeni wakhe ubungakaziswa kodwa kusatshelwe isinqandamathe sakhe kuphela.
Ababhekelele ezokuxhumana kwaShoprite okuyiwona ophethe iComputicket bathe bayazwelana nemindeni yabashonelwe.
Inkampani ekhiqiza ubhiya iSouth African Breweries ekhiqiza iCarling Black Label engabaxhasi bomdlalo, ithe izolekelela imindeni eshonelwe ngezindleko zomgcwabo.