UMalema akazimisele neze ukuxolisa
UMHOLI we-EFF, uMnuz Julius Malema, uthi akajiki kwakushilo ngamaNdiya ngisho esebikwe kwiSouth African Human Rights Commission (SAHRC).
Izolo umkhulumeli we-EFF, uMnuz Mbuyiseni Ndlozi, utshele ukuthi uMalema akazisoli ngokuthi amaNdiya axhaphaza abasebenzi bawo abamnyama futhi yiwona aphethe uMasipala weTheku.
“Uma bekhala kwi-SAHRC bathini, yikuphi okungesilo iqiniso okushiwo ngu-CIC (Malema)? Akukho azokuhoxisa ngoba ubekhuluma iqiniso futhi sonke simi naye kulokho akushilo.
Uyaziwa u-CIC ukuthi uyabagxeka abelungu, uyabagxeka nabantu abamnyama abadla imali futhi abakaze bamcebe kwi-SAHRC. AmaNdiya akumele azitshele ukuthi akufanele agxekwe,” kusho uNdlozi.
Uthe amaNdiya angabaxhaphazi abasebenzi bawo ngeke agijimele kwi-SAHRC kodwa lawo angabaphethe kahle abasebenzi yiwona aceba u-CIC.
UMnuz Jonathan Annipen, we-Minority Front, usigxekile isitatimende sikaMalema esho nokuthi sizodala udlame noqhekeko.
“AmaNdiya awabaphathi kabi abantu abamnyama, akusilo iqiniso lokhu okushiwo ngusomathuba onguMalema. Kudala amaNdiya ephilisana kahle nabamnyama. Sesiludlulisele kwi-SAHRC udaba lukaMalema othuka amaNdiya. Ukukhuluma kanjena kuzodala udlame esingaludingi emuva kokusebenza kanzima ukuhlanganisa abantu baKwaZulu-Natal,” kusho u-Annipen.
UMnuz Ashin Singh we-SA Minority Rights Equality Movement (Samrem) uthe baludlulisele kwiSAHRC udaba lukaMalema wathi akaqali ukuyiswa kule nhlangano ngenxa yezitatimende ezicwasa amaNdiya.
I-DA ithe ifuna ukuthi usomabhizinisi waseThekwini uMnuz Shabir Shaik abuyele ejele ngoba kuyacaca ukuthi akaguleli ukufa emuva kokuphawula kwakhe ezinkundleni zokuxhumana egxeka uMalema.
UShaik wayengumeluleki wezimali kaMengameli Jacob Zuma kanti waboshelwa ukukhwabanisa nenkohlakalo wagwetshwa iminyaka engu-15 kodwa wadedelwa ngo-2009 emuva kokubonakala egulela ukufa.
UShaik uba sezindabeni emuva kokubhala ezinkundleni zokuxhumana ukuthi uphoxekile ngenkulumo kaMalema egxeka amaNdiya.
Izolo uMnuz James Selfe obhekelele ezamajele kwi-DA uthe ungqongqoshe walo uMnuz Michael Masutha kufanele abuyisele ejele uShaik ukuze ayodonsa iminyaka yakhe esele.
UNdlozi uthe uShaik makagxile ekuguleni kwakhe komkokotelo ayeke i-EFF ikhuze umhlola wokuxhashazwa kwabantu.
Imizamo yokuxhumana nabakwa SAHRC ukuqinisekisa ukuthi bayitholile yini i-email ekhala ngenkulumo kaMalema ayiphumelelanga. Kuze kwashaya isikhathi sokushicilela bengaphendulanga.