Uchayiswe uhlelo lungakaqali
USHAYWE ngesithende owayengumsakazi we-East Coast Radio, uZaba Simbine, okhishiwe njengomethuli wohlelo lomculo iVodacom NXT LVL lungakaqali ngisho kuthelevishini.
UZaba, owayethula uhlelo lwantambama noPhat Joe kwi-ECR ushiye kulo msakazo emasontweni edlule.
Akucaci noma ushiye ngoba ayesethole umsebenzi wokwethula lolu hlelo yini.
Le ntokazi yaseThekwini yase iqalile ukubonakala ezikhangisweni zohlelo.
Ngokuthola kweSolezwe, uhlelo bekumele ludlale kuSABC 1 kodwa kwaba khona izinguquko njengoba seluzodlala kuMzansi Magic.
“IMzansi Magic ithe ifuna umuntu onesipiliyoni ozolwethula hhayi uZaba. Yingakho abadidiyeli kuphoqeleke ukuthi bamshintshe,” kusho umthombo.
Okhulumela iVodacom, uByron Kennedy uthe: “Ulwazi onalo mayelana noshintsho kubethuli lushaya emhloleni.”
Uthe amagalelo kaZaba kusukela kuqalile abasize kakhulu futhi uzokhokhelwa imali yakhe ephelele ngakwenzile.
“Uhlelo iNXT LVL luzodlala kuMzansi Magic kusukela ngoSepthemba futhi luzoveza nezilomo zomculo zaseMzansi uDJ Zinhle, Danny K, DJ Euphonik, Riky Rick nabaseThekwini iBig NUZ njengabantu ababukela kubo,” kusho uKennedy.
Lolu hlelo luzobe lukhombisa abaculi abasafufusa befundiswa yilezi zilomo ngendlela ebheke empumelelweni.
Umthombo uthe iMzansi Magic iphakamise igama likaDenise Zimba ukuthi kube nguye olwethulayo.
“Umethuli omusha wohlelo uzomenyezelwa ngokuhamba kwesikhathi,” kusho uKennedy.
Imenenja kaZaba, uRenee Burton ithe ibingakazi ngalokhu. Icele ukuthunyelelwa i-email ngoMsombuluko nokushaye isikhathi sokushicilela ingayiphendulanga.
NeMzansi Magic igcine ingayiphendulanga imibuzo ethunyelelwe yona ngoLwesihlanu.
UZaba uyazifela ngethelevishini. Uke wethula uhlelo lwakuSABC 2, iHectic Nine 9 futhi uke wazama inhlanhla yokulingisa kwiRhythm City ku-e.tv.